રાજકોટ શહેરમાંથી એસટી બસના મુસાફરો છીનવી જતા 100 જેટલા ખાનગી વાહનો ડિટેઇન કરવામાં આવ્યા હતા તેમજ અન્ય 176 ખાનગી વાહનોને મેમો આપી કુલ રૂ.6,18,394ના દંડની વસુલાત કરવામાં આવી હતી.વિશેષમાં રાજકોટ એસટી ડિવિઝન કચેરીના સૂત્રોએ જણાવ્યું હતું કે, રાજકોટ શહેરમાં ઢેબર રોડ એસટી બસ પોર્ટ વિસ્તાર, ગ્રીનલેન્ડ ચોકડી, માધાપર ચોકડી, ગોંડલ રોડ ચોકડી, બેડી ચોકડી, આજી ડેમ ચોકડી સહિતના શહેરના હાઇવે એન્ટ્રી પોઇન્ટ્સ તેમજ શહેરના અન્ય વિવિધ વિસ્તારોમાં આવેલા બસ સ્ટોપ ઉપરથી એસટી બસના મુસાફરો છીનવતા કુલ 100 ખાનગી વાહનો ડિટેઇન કરાયા હતા જેમાં ઇકો કાર, તુફાન જીપ, સિટી રાઇડ, મિની બસ, ખાનગી ટ્રાવેલ્સ કંપ્નીઓની લકઝરી બસ સહિતના વાહનો સમાવિષ્ટ છે. અન્ય 176 ખાનગી વાહનોને મેમો અપાયા હતા તેમજ કુલ રૂ.6.18 લાખના દંડની વસુલાત કરાઇ હતી. રાજકોટ શહેરમાં એસટી બસ પોર્ટ ઉપરાંત ડિવિઝન હેઠળના ગોંડલ, મોરબી, જસદણ, વાંકાનેર, ચોટીલા, લીંબડી, ધ્રાંગધ્રા અને સુરેન્દ્રનગર સહિતના તમામ નવ ડેપોના વિસ્તારમાં પણ રાજકોટ શહેરની જેમ નો-પાર્કિંગ ઝોનના ભંગ અંગે ચેકિંગ કરવા તેમજ સીઓ ચેકિંગની કાર્યવાહી કરવા માટે વિભાગીય નિયામક જે.બી. કલોતરા દ્વારા આદેશ કરવામાં આવ્યો છે. ઉપરોક્ત કામગીરીમાં રાજકોટ એસટી ડિવિઝનના સ્ટાફ સાથે આરટીઓ તેમજ ટ્રાફિક પોલીસ સ્ટાફ પણ જોડાયો હતો.