દારૂના આ દરોડાની જાણવા મળતી વિગતો મુજબ, યુનિવર્સિટી પોલીસ મથકના પીઆઇ એચ.એન.પટેલની રાહબરી હેઠળ પી.એસ.આઇ વી.જી.ડોડીયા તથા તેમની ટીમ પેટ્રોલિંગમાં હતી. દરમિયાન હેડ કોન્સ્ટેબલ ક્રિપાલસિંહ ઝાલા, કોન્સ્ટેબલ ગોપાલસિંહ જાડેજાને મળેલી બાતમીના આધારે નાણાવટી ચોક પાસે નંદનવન આરએમસી આવાસ યોજના કવાર્ટરમાં ધાબા પરથી નયન પ્રફુલભાઈ પરમાર (ઉ.વ 20 રહે. નંદનવન આરએમસી આવાસ યોજના કવાર્ટર બ્લોક નંબર 8) ને રૂપિયા 24,900 ની કિંમતના 72 બોટલ દારૂના જથ્થા સાથે ઝડપી લીધો હતો. પોલીસે આરોપીની પૂછતાછ કરતા દારૂ પ્રકરણમાં અન્ય આરોપી જય અતુલભાઇ મકવાણા (રહે. નાણાવટી ચોક, નંદનવન આવાસ યોજના ક્વાર્ટર)નું નામ ખુલ્યું હતું. જેને ઝડપી લેવા પોલીસે તપાસ હાથ ધરી છે.

દારૂના અન્ય દરોડામાં કુવાડવા પોલીસ મથકના સ્ટાફે રાજકોટ અમદાવાદ હાઈવે પર સોખડા બસ સ્ટેન્ડથી આગળ રવેચી હોટલ સામેથી હાર્દિક છોટાલાલ બારૈયા (રહે. નવાપરા તા.વાંકાનેર)ને દારૂના 15 ચપલા સાથે ઝડપી લીધો હતો. પોલીસે દારૂનો આ જથ્થો એકટીવા સહિત 56,500 નો મુદ્દામાલ કબજે કર્યો હતો. આ શખસની પૂછતાછ દારૂ પ્રકરણમાં અન્ય આરોપી દેવરાજ વાલાણીનું નામ ખુલતા તેને ઝડપી લેવા તપાસ હાથ ધરી છે.