Foxconn India ભારતમાં Apple માટે iPhone બનાવે છે. એપલના આ સપ્લાયરના એક નિયમને લઈને હવે વિવાદ વધી ગયો છે. ફોક્સકોન ઈન્ડિયાના આઈફોન પ્લાન્ટમાં પરિણીત મહિલાઓને કામ ન કરવા દેવાનો મુદ્દો જોર પકડવા લાગ્યો છે. હવે શ્રમ અને રોજગાર મંત્રાલયે કહ્યું કે તેણે આ મુદ્દે તમિલનાડુના શ્રમ વિભાગ પાસેથી વિગતવાર રિપોર્ટ માંગ્યો છે. આ અંગે મીડિયામાં અહેવાલો આવ્યા હતા, જે બાદ શ્રમ વિભાગે આ પગલું ભર્યું છે.

શ્રમ મંત્રાલયે એક નિવેદનમાં જણાવ્યું છે કે સમાન મહેનતાણું અધિનિયમ 1976ની કલમ 5 સ્પષ્ટપણે જણાવે છે કે પુરુષ અને મહિલા કામદારોની ભરતી કરતી વખતે કોઈ ભેદભાવ ન હોવો જોઈએ. તેમાં કહેવામાં આવ્યું છે કે રાજ્ય સરકાર આ કાયદાની જોગવાઈઓના અમલીકરણ અને વહીવટ માટે યોગ્ય સત્તા હોવાથી તેની પાસેથી રિપોર્ટ માંગવામાં આવ્યો છે. ઉપરાંત, તેમાં કહેવામાં આવ્યું છે કે પ્રાદેશિક મુખ્ય શ્રમ કમિશનરની કચેરીને પણ ભારત સરકારના શ્રમ અને રોજગાર મંત્રાલયને રિપોર્ટ સબમિટ કરવાનો નિર્દેશ આપવામાં આવ્યો છે.

શ્રમ અને રોજગાર મંત્રાલયે મીડિયા અહેવાલોને ધ્યાનમાં લીધા છે કે ફોક્સકોન ઇન્ડિયા એપલ આઇફોન પ્લાન્ટમાં પરિણીત મહિલાઓને કામ કરવાની મંજૂરી આપવામાં આવી નથી. ફોક્સકોન ઈન્ડિયા એ તાઈવાની ઈલેક્ટ્રોનિક્સ કંપની ફોક્સકોનની ભારતીય પેટાકંપની છે. તે વિશ્વની સૌથી મોટી ઇલેક્ટ્રોનિક્સ કોન્ટ્રાક્ટ મેન્યુફેક્ચરિંગ કંપનીઓમાં સામેલ છે. ફોક્સકોન ઈન્ડિયા iPhone, iPad અને અન્ય ઈલેક્ટ્રોનિક ઉપકરણો સહિત Apple ઉત્પાદનો માટે મુખ્ય સપ્લાયર છે. ફોક્સકોન ભારતમાં અનેક ફેક્ટરીઓ ધરાવે છે, જેમાં તમિલનાડુ, આંધ્રપ્રદેશ અને કર્ણાટકમાં પ્લાન્ટનો સમાવેશ થાય છે.