ગઈકાલે ભારતીય ટીમે ધર્મશાલા ટેસ્ટમાં ઈંગ્લેન્ડને આસાનીથી હરાવ્યું, બેન સ્ટોક્સની ટીમને એક ઇનિંગ્સ અને 64 રનથી હારનો સામનો કરવો પડ્યો હતો. આ જીત બાદ ટીમ ઈન્ડિયા ત્રણેય ફોર્મેટ એટલે કે ટેસ્ટ, ODI અને T20માં ટોપ પર બની ગઈ છે. હવે ભારત 122 રેટિંગ પોઈન્ટ સાથે નંબર વન પર છે. ODI રેન્કિંગમાં ટીમ ઈન્ડિયા 121 રેટિંગ પોઈન્ટ સાથે ટોપ પર છે. જ્યારે T20 ફોર્મેટમાં તે 266 રેટિંગ પોઈન્ટ સાથે નંબર-1 ટીમ છે.

આ સિવાય જસપ્રીત બુમરાહ ICC ટેસ્ટ રેન્કિંગમાં નંબર-1 બોલર છે. જસપ્રીત બુમરાહ 867 રેટિંગ પોઈન્ટ સાથે ટોપ પર છે. રવિ અશ્વિન 846 રેટિંગ પોઈન્ટ સાથે બીજા સ્થાને છે. ભારત-ઈંગ્લેન્ડની ધર્મશાલા ટેસ્ટ પહેલા ઓસ્ટ્રેલિયા આઈસીસી ટેસ્ટ રેન્કિંગમાં ટોપ પર હતું, પરંતુ હવે ટીમ ઈન્ડિયાએ કાંગારૂઓને પાછળ છોડી દીધા છે. ઓસ્ટ્રેલિયા 117 રેટિંગ પોઈન્ટ સાથે બીજા સ્થાને છે. આ પછી ન્યુઝીલેન્ડ 111 રેટિંગ પોઈન્ટ સાથે ત્રીજા સ્થાને છે.

ન્યૂઝીલેન્ડનો કેન વિલિયમસન ICC ટેસ્ટ રેન્કિંગમાં નંબર-1 બેટ્સમેન છે. કેન વિલિયમસન 870 રેટિંગ પોઈન્ટ સાથે ટોપ પર છે. આ પછી ઈંગ્લેન્ડનો જો રૂટ 799 રેટિંગ પોઈન્ટ સાથે બીજા સ્થાને છે. ઓસ્ટ્રેલિયાનો સ્ટીવ સ્મિથ 789 રેટિંગ પોઈન્ટ સાથે નંબર-3 બેટ્સમેન છે. ભારતીય બેટ્સમેનોની વાત કરીએ તો વિરાટ કોહલી અને યશસ્વી જયસ્વાલ ટોપ-10માં છે. વિરાટ કોહલી 744 રેટિંગ પોઈન્ટ સાથે આઠમા સ્થાને છે. જ્યારે યશસ્વી જયસ્વાલ 727 રેટિંગ પોઈન્ટ સાથે દસમા સ્થાને છે. ભારતીય કેપ્ટન રોહિત શર્મા 720 રેટિંગ પોઈન્ટ સાથે 11માં નંબર પર છે.