દુનિયામાં એવા ઘણા લોકો છે જેઓ અજીબોગરીબ ચેલેન્જ લે છે અને તેમને પૂરા કરે છે, પરંતુ કેટલાક એવા પડકારો છે જેના વિશે વિચારીને જ આશ્ચર્ય થાય છે. આવી જ એક ચેલેન્જ છે ‘ટાઈગર શાર્ક ડાયેટ ચેલેન્જ’. આ ચેલેન્જની ખાસ વાત એ છે કે વ્યક્તિએ ટાઈગર શાર્ક જેટલો ખોરાક લેવો પડે છે, જે સામાન્ય રીતે અશક્ય છે, પરંતુ એક વ્યક્તિ એવી છે જેણે આ અશક્યને શક્ય બનાવી દીધું છે. તેણે એટલું બધું ખાધું છે કે માત્ર 24 કલાકમાં તેનું વજન 10 કિલો વધી ગયું છે. હા, આ સાચી ઘટના છે.

આ વ્યક્તિનું નામ રોસ એડગલી છે. આ 38 વર્ષીય અલ્ટ્રા-એથ્લેટે એવી સિદ્ધિઓ હાંસલ કરી છે જે લગભગ અકલ્પનીય છે. તેણે માનવ સહનશક્તિની સીમાઓને પાર કરી દીધી છે. તેણે 50 કિલો સામાન લઈને ખુલ્લા પગે 1,000 માઈલ દોડવાનો રેકોર્ડ તો બનાવ્યો જ, પરંતુ તેણે 56 કલાકમાં 500 કિલોમીટર નોન-સ્ટોપ સ્વિમિંગ કરવાનો અને એક વૃક્ષને ઊંચકીને ઓલિમ્પિક ડિસ્ટન્સ ટ્રાયથ્લોન પૂર્ણ કરવાનો વર્લ્ડ રેકોર્ડ પણ બનાવ્યો, પરંતુ આ વખતે તેનો ચેલેન્જ કદાચ હજુ સુધી તેનો સૌથી અઘરો ચેલેન્જ છે. 

ડોક્યુમેન્ટ્રી માટે તેણે પાણીમાં સ્વિમિંગ કરીને વિશ્વની સૌથી ઝડપી શાર્કને હરાવવાનો પ્રયાસ કર્યો હતો. આ સિવાય તે ટાઈગર શાર્ક જેવો ખોરાક પણ ખાતો હતો. અહેવાલ મુજબ, એડ્લીએ ખુલાસો કર્યો કે તેને ટાઈગર શાર્ક જેટલું ખાવાની ક્ષમતામાં ઘણો વિશ્વાસ હતો. તેણે કહ્યું કે તે ખરેખર ટાઈગર શાર્કની જેમ ખાવામાં સ્પર્ધા કરી શકે છે. ટાઈગર શાર્ક ખોરાકની શોધમાં સેંકડો કિલોમીટરની મુસાફરી કરી શકે છે અને ટાયરથી લઈને વ્હેલના શબ અને કાચબાના શેલ સુધી બધું ખાઈ શકે છે.

અહેવાલો અનુસાર, રોસ એડગલી અને તેમની ટીમે ટાઈગર શાર્કની ખાવાની ક્ષમતા માપવા માટે એક અનોખો પ્રયોગ કર્યો હતો. તેઓએ શાર્કના સંભવિત ખોરાકનો અંદાજ કાઢ્યો. આ સમય દરમિયાન, ટીમને જાણવા મળ્યું કે જો ટાઈગર શાર્ક એક જ વારમાં 20 હજાર કેલરી ખાઈ શકે છે. એડ્લીએ એક ચેલેન્જ લીધો અને તેણે એક જ દિવસમાં કુલ 41,103 કેલરી ફૂડ ખાધું, જેના કારણે તેનું વજન 10 કિલો વધી ગયું.