હાલ 33 દર્દીઓ જ સારવાર હેઠળ: મંગળવારે શહેરમાં 11 અને તાલુકામાં 3 નવા કેસ નોંધાયા

જાન્યુઆરી માસનાં પ્રારંભે કોરોનાની સારવાર લઈ રહેલા દર્દીઓની સંખ્યા 60થી ઉપર હતી. આ સંખ્યામાં સતત ઘટાડો થતાં ઉતરાયણ આવતા સુધીમાં 50 ટકા ઘટાડા સાથે આ સંખ્યા 33 થઈ છે. મંગળવારે જિલ્લામાં 14 કોરોના પોઝિટિવ કેસ નોંધાયા અને 17 દર્દીઓ કોરોનામુક્ત થયા છે.

ભાવનગર જિલ્લામા 14 નવા કોરોના પોઝિટિવ કેસમાં ભાવનગર શહેરી વિસ્તારમા 7 પુરૂષ અને 4 સ્ત્રી મળી કુલ 11 કેસ નોંધાયા જ્યારે તાલુકાઓમા ઘોઘા તાલુકાના તણસા ગામ ખાતે 1, સિહોર તાલુકાના સણોસરા ગામ ખાતે 1 તથા મહુવા તાલુકાના નૈપ ગામ ખાતે 1 કેસ મળી કુલ 3 લોકોના કોરોના રીપોર્ટ પોઝિટિવ આવતા તેમને વધુ સારવાર માટે દાખલ કરવામા આવેલ છે. આ સાથે મહાનગરપાલિકાના 16 તેમજ તાલુકાઓના 1 એમ કુલ 17 કોરોના પોઝિટિવ દર્દી કોરોનામુક્ત થતા તેને હોસ્પિટલમાંથી રજા અપાઈ છે. આમ જિલ્લામા નોંધાયેલા 5,947 કેસ પૈકી હાલ 33 દર્દીઓ સારવાર હેઠળ છે. જ્યારે અત્યાર સુધીમા કુલ 5,838 દર્દીઓને ડિસ્ચાર્જ કરવામા આવ્યા છે.