ચુંટણી નજીક આવતા ગઠબંધન શામેલ પાર્ટીઓએ કાં તો પક્ષ બદલ્યો અથવા એકલા રાજકીય મેદાનમાં ઉતાવારનું નક્કી કર્યું
​​​​​​​ 

આંખ ગઈ અને ફૂલુ રહી ગયુની માફક જેમ જેમ કોંગ્રેસની ભારત જોડો ન્યાય યાત્રા આગળ વધી તેમ તેમ ઇન્ડિયા ગઠબંધન વીખરાવા લાગ્યું છે. હવે ઇન્ડિયા અલાયન્સના મોટા ચહેરાઓએ જ કોંગ્રેસને સીટો આપવાનો ઇનકાર કર્યો છે. પશ્ચિમ બંગાળમાં ટીએમસી, બિહારમાં જેડી-યુ, પંજાબ અને દિલ્હીમાં આપએ સાથ છોડ્યા બાદ કોંગ્રેસ અને સાંસદ રાહુલ ગાંધીને ઉત્તર પ્રદેશમાં સમાજવાદી પાર્ટી તરફથી પણ આંચકો મળે તેવી સંભાવના છે. 

આઠ મહિના પહેલા, ૨૮ વિપક્ષી દળોએ ભાજપને ટક્કર આપવા માટે ભારત ગઠબંધન બનાવવા માટે એકસાથે આવી હતી. લોકસભા ચૂંટણીની તૈયારીઓ વચ્ચે કોંગ્રેસ નેતા રાહુલ ગાંધીની ભારત જોડો ન્યાય યાત્રા મણિપુરથી શરૂ થઈ છે. આ યાત્રા ભલે કોંગ્રેસ સંગઠનને મજબૂત કરી રહી હોય, પરંતુ તે ઇન્ડિયા ગઠબંધનનું વિઘટન પણ કરી રહી છે.

જો યાત્રાના કારણે બંગાળ, બિહાર, યુપી જેવા રાજ્યોમાં કોંગ્રેસ મજબૂત બને છે તો તેના સાથી પક્ષોને નુકસાન વેઠવું પડી શકે છે. કોઈપણ સાથી પક્ષ કોંગ્રેસને તેના પ્રભાવવાળા વિસ્તારોમાં કોઈ જગ્યા આપવા માંગતો નથી. કોંગ્રેસના રાજ્ય એકમો પણ સાથી પક્ષો માટે વધુ બેઠકો છોડવા તૈયાર નથી.  રાહુલ ગાંધીની યાત્રા સોમવારે પ્રતાપગઢ થઈને અમેઠી પહોંચી હતી. રાહુલ અમેઠીમાં ૨૦૧૯ની લોકસભા ચૂંટણી હારી ગયા હતા, પરંતુ તેમના સ્વાગત માટે હજારો લોકો એકઠા થયા હતા. 

આ પહેલા તેમણે પ્રતાપગઢમાં સભામાં કહ્યું હતું કે રામ મંદિરના અભિષેક સમારોહમાં અદાણી, અંબાણી, અમિતાભ બચ્ચન, કોહલી જોવા મળ્યા હતા, પરંતુ ખેડૂતો, મજૂરો અને ગરીબો જોવા મળ્યા ન હતા. તેમણે કહ્યું કે રાષ્ટ્રપતિ આદિવાસી છે, પરંતુ રામ મંદિરમાં તેમનો ચહેરો જોવા મળ્યો નથી. મંદિરના અભિષેક માટે દલિતો, પછાત વર્ગો અને આદિવાસીઓને આમંત્રણ આપવામાં આવ્યું ન હતું. કોંગ્રેસ અધ્યક્ષ મલ્લિકાર્જુન ખડગે યાત્રામાં ભાગ લેવા માટે સોમવારે સાંજે અમેઠી પહોંચ્યા હતા. તેમણે પત્રકારોને અખિલેશના નિવેદન પર પ્રતિક્રિયા આપી હતી. અને કહ્યું હતું કે, થોડા સમયમાં બધું સારું થઈ જશે, કોઈ સમસ્યા નથી.


આજે ન્યાય યાત્રા સ્થગિત, કોર્ટમાં હાજર થશે રાહુલ ગાંધી

કોંગ્રેસના મહાસચિવ જયરામ રમેશે જણાવ્યું હતું કે ભાજપના નેતા દ્વારા દાખલ કરવામાં આવેલા માનહાનિના કેસમાં આજે  સવારે સુલતાનપુર જિલ્લા કોર્ટમાં હાજર થવા માટે રાહુલ ગાંધીને સમન્સ જારી કરવામાં આવ્યું છે. આ કારણે યાત્રા સવારે બંધ રહેશે અને અમેઠીના ફુરસતગંજથી બપોરે ૨ વાગ્યે ફરી શરૂ થશે.

કોંગ્રસનો સાથ છોડવામાં ‘દીદી’એ કરી પહેલ 

રાહુલ ગાંધીના બંગાળના પ્રવાસે પહોંચતા જ ટીએમસી પ્રમુખ મમતા બેનર્જીએ એકલા હાથે ચૂંટણી લડવાની જાહેરાત કરી હતી. તેણે યાત્રામાં જોડાવાની ના પાડી. મમતા બેનર્જીએ કોંગ્રેસની ભારત જોડો ન્યાય યાત્રાને લઈને પણ નિવેદન આપ્યું હતું. તેમણે કહ્યું- ૨૫ જાન્યુઆરીએ અમારા રાજ્યમાંથી રાહુલ ગાંધીની ન્યાય યાત્રા પસાર થઈ રહી છે, પરંતુ અમને તેની જાણ સુદ્ધાં કરવામાં આવી ન હતી. અમને યાત્રામાં જોડાવા માટે કહેવામાં આવ્યું નથી, તેથી અમે તેમાં જોડાઈશું નહીં. 

બિહારમાં નીતિશ, પંજાબમાં માન અને દિલ્હીમાં કેજરીવાલે કોંગ્રેસને આપ્યો દગો 

જ્યારે કોંગ્રેસની ન્યાય યાત્રા બિહાર પહોંચી ત્યારે પૂર્ણિયામાં સભામાં ભાગ લેવાને બદલે નીતીશ કુમાર ભારત ગઠબંધન છોડીને એનડીએમાં જોડાયા હતા. હાલમાં તેજસ્વી યાદવ કોંગ્રેસને સપોર્ટ કરી રહ્યા છે પણ તેની પોતાની પાર્ટી નીતિશ કુમાર સામે ઘુટણીયે થઇ ચૂકી છે. બીજી તરફ આમ આદમી પાર્ટીએ પંજાબમાં એકલા હાથે લોકસભા ચૂંટણી લડવાની જાહેરાત કરી છે. ત્યાં આપ સત્તામાં છે અને કોંગ્રેસ મુખ્ય વિરોધ પક્ષ છે. બંને પક્ષોના રાજ્ય એકમો ગઠબંધનની વિરુદ્ધમાં હતા. રાષ્ટ્રીય રાજધાની દિલ્હીની આપ સરકારે પણ ચુંટણી એકલા હાથે લડવાની જાહેરાત કરી છે. અરવિંદ કેજરીવાલે સ્પષ્ટ સંકેતોમાં જણાવ્યું છે કે દિલ્હીની સંપૂર્ણ સીટો પર આપ ઉમેદવારો જ ચુંટણી લડશે. થોડા દિવસો પહેલા આરએલડીના જયંત સિંહ મહાગઠબંધનથી દૂર થઈ ગયા હતા. નેશનલ કોન્ફરન્સના ફારૂક અબ્દુલ્લાએ સૌથી પહેલા જમ્મુ-કાશ્મીરમાં એકલા હાથે ચૂંટણી લડવાની જાહેરાત કરી હતી. ત્યારે ગતરોજ જાહેરાત કરી પીડીપીના વડા મહેબૂબા મુફ્તીએ પણ આ જ માર્ગ અપનાવ્યો છે. હવે ઉત્તર પ્રદેશમાં યાત્રા ચાલી રહી છે. 

અખિલેશના બદલાતા સૂર, કહ્યું, બેઠક વહેંચણી બાદ યાત્રામાં જોડાશે
​​​​​​​
સમાજવાદી પાર્ટીના વડા અખિલેશ યાદવે રાયબરેલીની યાત્રામાં ભાગ લેવાની જાહેરાત કરી હતી, પરંતુ હવે તેઓ પલટવાર કરતા જોવા મળી રહ્યા છે. તેમના સૂર બદલાઈ ગયા છે. સોમવારે તેમણે કહ્યું કે કોંગ્રેસ સાથે સીટ વહેંચણી પર ચર્ચા ચાલી રહી છે. આ પછી તેઓ યાત્રામાં જોડાશે. અગાઉ, સપાએ કોંગ્રેસને ૧૧ બેઠકો પર ચૂંટણી લડવાનો પ્રસ્તાવ મૂક્યો હતો, જેના કારણે બંને પક્ષો વચ્ચે નિવેદનબાજી શરૂ થઈ ગઈ હતી. ગઈકાલે સપા પ્રમુખ અખિલેશ યાદવે કોંગ્રેસ માટે ૧૭ લોકસભા સીટો છોડવાનો નિર્ણય કર્યો છે. કોંગ્રેસ મુરાદાબાદ, ફરુખાબાદ અને બલિયા લોકસભા સીટો પણ ઈચ્છે છે. મુરાદાબાદ એ સપાની જીતેલી બેઠક છે જ્યારે બલિયા પાર્ટીની મજબૂત બેઠકોમાંથી એક છે. કોંગ્રેસ ૧૯ સીટોની માંગ કરી રહી છે, જ્યારે સપા મહત્તમ ૧૭ સીટો આપવા તૈયાર છે.