શહેરોમાં સૂપડાં સાફ થયા પછી હવે કોંગ્રેસને ગામડાંઓમાં પણ પરાજયનો ડર

  • February 25, 2021 12:47 AM 
Aajkaal Daily (Desh Pardesh Ni Aajkaal)

રાજ્યની સ્થાનિક સ્વરાજ્યની ચૂંટણીમાં ૬ મહાનગર પાલિકામાં સુપડા સાફ થઈ ગયા બાદ હવે કોંગ્રેસને ડર સતાવી રહ્યો છે કે ચૂંટણીના આગામી રાઉન્ડમાં પંચાયત અને નગરપાલિકામાં આ પરિણામની અસર દેખાશે અને ૨૮મી ફેબ્રુઆરીએ થનારા આ મતદાનમાં પણ કોંગ્રેસને ફટકો પડી શકે છે.


કોંગ્રેસ આમ પણ આ ૬ મહાનગરપાલિકામાં વિરોધ પક્ષમાં જ હતી જોકે આ વખતે તો રાજ્યમાં કોંગ્રેસનો એવો રકાસ નીકળ્યો છે કે વિરોધ પક્ષના નેતાની પોસ્ટ મેળવવા માટે પણ ક્વોલિફાય નથી થતી. ૨૦૧૫માં આવેલી ત્રણ આંકડાની ૧૭૫ બેઠકોમાંથી આ વખતે પાર્ટી બે આંકડાની ૫૫ બેઠકો પર સજ સમેટાઈ ગઈ છે. આ ચૂંટણીમાં કોંગ્રેસેને ૧૨૦ બેઠકોનું નુકસાન થયું છે. જ્યારે તે પૈકી આમ આમદી પાર્ટીએ પોતાના ફાળે ૨૭ બેઠકો ભેગી કરી છે તો ઓવેસીની  દ્વારા મુસ્લિમ બહુલ વિસ્તારોમાં સારું પ્રદર્શન કરતા ૭ બેઠકો પર કબ્જો જમાવ્યો છે. જ્યારે બાકીની બેઠકો ભાજપ લઈ ગયું છે.


કોંગ્રેસને પહેલાથી જ એ વાતનો ભય હતો કે જો મહાનગરપાલિકાની ચૂંટણીના પરિણામ પહેલા જાહેર કરી દેવામાં આવશે તો ૨૮મી તારીખે યોજાનાર ૩૧ જિલ્લા પંચાયત, ૨૩૧ તાલુકા પંચાયત અને ૮૧ નગરપાલિકાઓની ચૂંટણી પર તેની અસર જોવા મળશે. જેના કારણે તેણે ગુજરાત હાઈકોર્ટ અને સુપ્રીમ કોર્ટ સુધી લડત લડી હતી કે મહાનગરપાલિકાનું પરિણામ પણ જિલ્લા અને તાલુકા પંચાયત અને નગરપાલિકા ચૂંટણીના પરિણામ સાથે જ જાહેર કરવામાં આવે જોકે કોંગ્રેસના બદનસીબ કે હાઈકોર્ટ અને સુપ્રીમ કોર્ટ બંને તરફથી કોંગ્રેસની આ અરજીને નિષ્ફળતા જ સાંપડી હતી.


મહત્વનું છે કે ૨૦૧૫માં પંચાયતોમાં ભાજપ કરતા કોંગ્રેસે ઘણું સારું પ્રદર્શન કર્યું હતું. હા તે સમયે પણ મહાનગરપાલિકાઓ ભાજપના જ ફાળે રહી હતી પરંતુ અહીં જીત ખૂબ જ પાતળી સરસાઈથી મળી હતી. જ્યારે આ વખતે ૬ મહાનગરપાલિકાઓમાં બંપર જીત સાથે ભાજપે ફરી એકવાર સાબિત કરી દીધું છે કે ગુજરાતના શહેરી મતદારો તેની સાથે જ છે. ગુજરાત વિધાનસભાની કુલ ૪૪ બેઠકો આ શહેરી વિસ્તારોમાં આવેલી છે. વર્ષ ૨૦૧૭ની વિધાનસભા ચૂંટણીમાં ભાજપને પાટીદાર અનામત આંદોલનના કારણે નુકસાન ભોગવવું પડ્યું હતું. તેમજ ગ્રામ્ય વિસ્તારોમાં કોંગ્રેસને ફાયદો થયો હતો. 


જોકે તે પછી પણ શહેરી વિસ્તારમાં ભાજપની સ્થિતિને કોઈ ફરક પડતો નથી. કોંગ્રેસના નેતા પરેશ ધાનાણીએ કહ્યું કે, અમે આવી કારમી હાર ક્યારેય અપેક્ષિત કરી નહોતી. આ અમારા માટે હવે જાગી જવાનો સંકેત છે. 


૨૦૧૭માં પણ અમે વિધાનસભા ચૂંટણીમાં ગ્રામ્ય વિસ્તારોમાં ખૂબ જ સારું પ્રદર્શન કર્યું હતું અને સરકાર બનાવવાથી હાથવેંત છેટું પડ્યું હતું. તેનું કારણ પણ અમને શહેરી વિસ્તારમાં પૂરતી જીત નહોતી મળી તેનું છે. અમને લાગે છે કે ૨૦૨૨ની વિધાનસભા ચૂંટણીમાં જીતવા માટે પક્ષે શહેરી વિસ્તારમાં વધુ કામ કરવું પડશે અને પોતાની હાજરી દાખવવી પડશે.’


લાઈક અને ફોલો કરો અમારું ફેસબુક પેજ FACEBOOK - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


કોરોના અંગેના મહત્વના સમાચારો આપના મોબાઇલના વોટ્સ એપમાં મેળવવા માટે જોડાઓ અમારા વોટ્સ એપ ગ્રૂપમાં.  99251 12230  

View News On Application
RELATED NEWS