જામનગરમાં મૂકબધિર અને દિવ્યાંગ યુવતી સાથે છેડછાડનો ગંભીર બનાવ

June 01, 2026 05:18 PM

વિરોધ કરતાં ભાઈ પર છરીથી હુમલાનો પ્રયાસ, જાનથી મારી નાખવાની ધમકી: એટ્રોસિટી સહિતની ગંભીર કલમો હેઠળ ગુનો નોંધાયો

જામનગર શહેરના બાઈની વાડી વિસ્તારમાં એક મૂકબધિર અને દિવ્યાંગ યુવતી સાથે જાતીય સતામણી અને છેડછાડ થયાનો ગંભીર બનાવ પ્રકાશમાં આવ્યો છે. એટલું જ નહીં, ઘટનાની જાણ થતાં યુવતીના ભાઈએ આરોપીને પકડવાનો પ્રયાસ કરતાં તેના પર પણ હુમલો કરી જાનથી મારી નાખવાની ધમકી અપાઈ હોવાનું પોલીસ ફરિયાદમાં જણાવાયું છે.

આ અંગે સીટી એ ડિવિઝન પોલીસ મથકે નોંધાયેલી ફરિયાદ મુજબ બાઈની વાડી વિસ્તારમાં રહેતી ૨૧ વર્ષીય મૂકબધિર અને દિવ્યાંગ યુવતી પોતાના ઘરે એકલી હતી, ત્યારે આરોપી રીજવાન ઉર્ફે ચિનો ગનીભાઈ ખીરા સુમરા તેના ઘરમાં ઘૂસી ગયો હતો. આરોપીએ યુવતી સાથે અશ્લીલ હરકતો કરી તેની જાતીય સતામણી કરી હતી. ફરિયાદ મુજબ નિર્વસ્ત્ર કરવાના ઇરાદે યુવતીના કપડાં ફાડી નાખી તેની સાથે શારીરિક અડપલાં પણ કરવામાં આવ્યા હતા. ફરિયાદમાં વધુમાં જણાવાયું છે કે બાદમાં બીજી એક ઘટનામાં જ્યારે પીડિતા એક નાના બાળકને બાલમંદિરમાં મૂકવા જતી હતી, ત્યારે આરોપીએ જાહેરમાં તેનો હાથ પકડી ફરીથી અડપલાં કર્યા હતા અને ત્યાંથી નાસી ગયો હતો.

સમગ્ર બનાવની જાણ થતાં પીડિતાનો ભાઈ આરોપીને શોધી રહ્યો હતો. દરમિયાન આરોપી સામે મળી જતાં તેને પકડવાનો પ્રયાસ કરવામાં આવ્યો હતો. તે સમયે બંને વચ્ચે ઝપાઝપી સર્જાઈ હતી. જેમાં આરોપીએ ફરિયાદીને નખ વડે ઈજાઓ પહોંચાડી હતી. ઉપરાંત છરી કાઢી હુમલો કરવાનો પ્રયાસ કર્યો હતો. ફરિયાદી બચવા માટે ભાગતા આરોપીએ પાછળથી પથ્થરનો ઘા પણ કર્યો હોવાનું પોલીસ ફરિયાદમાં નોંધાયું છે.

ફરિયાદમાં આરોપીએ પીડિત પરિવારને જાનથી મારી નાખવાની ધમકી આપી હોવાનો પણ આક્ષેપ કરવામાં આવ્યો છે. આરોપી અને પીડિત પરિવાર એકબીજાને અગાઉથી ઓળખતા હોવા છતાં પીડિતા અનુસૂચિત જાતિની હોવાનું જાણતા હોવા છતાં તેના પ્રત્યે કથિત રીતે અશ્લીલ વર્તન અને જાતીય સતામણી કરવામાં આવી હોવાનું સામે આવ્યું છે.

બનાવની ગંભીરતાને ધ્યાનમાં રાખી સીટી એ ડિવિઝન પોલીસે આરોપી રીજવાન ઉર્ફે ચિનો ગનીભાઈ ખીરા સુમરા સામે ભારતીય ન્યાય સંહિતા-૨૦૨૩ની વિવિધ ગંભીર કલમો, એટ્રોસિટી એક્ટ તેમજ ગુજરાત પોલીસ એક્ટ હેઠળ ગુનો નોંધી વધુ તપાસ હાથ ધરી છે.

સમગ્ર કેસની તપાસ એસસી/એસટી સેલના નાયબ પોલીસ અધિક્ષક દ્વારા કરવામાં આવી રહી છે.

લાઈક અને ફોલો કરો અમારું ફેસબુક પેજ FACEBOOK - AAJKAALDAILY

ફોલો કરો અમારું ઇન્સ્ટાગ્રામ INSTAGRAM - AAJKAALDAILY

સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં 99251 12230

View News On Application

જામનગરમાં મૂકબધિર અને દિવ્યાંગ યુવતી સાથે છેડછાડનો ગંભીર બનાવ

Recent News

Gujarat's No. 1 evening newspaper