અયોધ્યા રામ મંદિરના અભિષેક માટે સંપૂર્ણ રીતે તૈયાર છે. શહેરને પણ સજાવવામાં આવ્યું છે અને ચારે તરફ દિવાળી જેવો માહોલ છે,સુરક્ષા પણ કડક કરવામાં આવી છે. અભિષેક માટે વિશ્વભરમાંથી અયોધ્યામાં ભેટ સોગાદો આવી રહી છે, ત્યારે ભગવાન હનુમાનના જન્મસ્થળ કિષ્કિંધાથી એક વિશેષ રથ અયોધ્યા પહોંચ્યો છે. આ રથ ત્રણ વર્ષથી સમગ્ર દેશમાં ભ્રમણ કરી રહ્યો છે. અયોધ્યા આવતા પહેલા આ ખાસ રથ માતા સીતાના જન્મસ્થળ સીતામઢીથી પસાર થયો છે.


આ રથ સાથે ચાલી રહેલા સ્વામી ગોવિંદાનંદ સરસ્વતીએ જણાવ્યું કે જે રીતે અયોધ્યામાં ભગવાન રામનું ભવ્ય મંદિર બનાવવામાં આવી રહ્યું છે. કિષ્કિંધામાં પણ આવું જ ભવ્ય મંદિર બનાવવાની તૈયારીઓ ચાલી રહી છે. આ પહેલા આ રથને ભગવાન રામના ભક્ત હનુમાનના પ્રતિક રૂપે અયોધ્યા લાવવામાં આવ્યો હતો. આ રથ પર કિષ્કિંધાના  પથ્થર કોતરાયેલો છે. રથ દ્વારા રામ ભક્તિનો પ્રચાર કરવામાં આવી રહ્યો છે. રથને જોવા માટે લોકોની ભીડ પણ ઉમટી પડી છે.


કિષ્કિંધા ક્યાં છે?
કિષ્કિંધા કર્ણાટકના કોપ્પલ વિજયનગર જિલ્લામાં સ્થિત છે. તે તુંગભદ્રા નદીના ઉત્તરી કાંઠે સ્થિત હમ્પી કરતાં પણ જૂનું છે. હાલમાં તે આનેગુંડી તરીકે ઓળખાય છે. હિંદુ માન્યતાઓ અનુસાર, કિષ્કિંધા વાંદરાઓનું રાજ્ય હતું. આ તે રાજ્ય હતું જેના પર સુગ્રીવે પોતાના સલાહકાર હનુમાનની મદદથી શાસન કર્યું હતું. આ જ કારણ છે કે હાલમાં કોપ્પલ જિલ્લામાં ભગવાન હનુમાનનું ભવ્ય મંદિર બનાવવાની માંગ ઉઠી છે.
​​​​​​​
મહત્વનું છે કે આનેગુંડી ગામમાં આવા ઘણા પુરાવા મળ્યા છે, જે સાબિત કરે છે કે આ સ્થળ રામાયણ કાળ સાથે જોડાયેલું છે. આ સમગ્ર વિસ્તાર પથ્થરો અને પહાડોથી ઘેરાયેલો છે. રામાયણમાં પણ આ સ્થાનનો ઉલ્લેખ છે અને આ સ્થાનની ભૂગોળ બરાબર એ જ રીતે સમજાવવામાં આવી છે. આનેગુંડી ગામમાં ઘણી પ્રાચીન ગુફાઓની શોધ વિશે પણ માહિતી છે.ખડકો અને પથ્થરો પર પણ વાંદરાઓના ચિત્રો મળી આવ્યા છે