રાજકોટ શહેરના કુવાડવા રોડ પર ક્રાઈમ બ્રાન્ચે દરોડા પાડી ત્રણ કરોડના બાયોડીઝલના જથ્થા સાથે બે વ્યક્તિને ઝડપી પાડ્યા છે.    

બનાવની વિગત અનુસાર, રાજકોટના કુવાડવા રોડ પર ત્રિમંદિર પાસે ક્રાઈમ બ્રાન્ચના પીઆઈને માહિતી મળી હતી કે, બાયોડીઝલનું યુનિટ અહીંયા ધમધમી રહ્યું છે. બાતમીના આધારે ક્રાઈમ બ્રાન્ચની ટીમે ગત રાત્રે દરોડા પાડ્યા હતા. પોલીસે ત્યાં ફેક્ટરીમાં તપાસ કરી તો છ ભો ટાંકા અને બે મોબાઇલ ટાંકા મળી આવ્યા હતા. તેમાંથી દોઢ લાખ લીટરથી વધુ બાયોડીઝલ મળી આવ્યું હતું. આ સાથે ત્યાં હાજર કામગીરી કરનાર દીપેશ મહેતા અને રાજેશ ચાવડાને પણ પોલીસે સંકજામાં લીધા હતા. જ્યારે કે દરોડા પહેલા જ ભરત વશરામ રામાણી, હિતેષ ડોબરિયા, નારાયણ ખખ્ખર અને આશિષ ડાંગર નાસી ગયા હતા. તપાસમાં એવું પણ સામે આવ્યું છે કે, અહીંયા છેલ્લા છ મહિનાથી બાયોડીઝલનો ગેરકાયદે કારોબાર થઈ રહ્યો હતો.