કાનપુર સ્થિત નેશનલ સુગર ઇન્સ્ટિટ્યૂટે એવી ખાંડની શોધ કરી છે જેનાથી ડાયાબિટીસ જેવી બીમારી થશે નહીં. NSI ડાયરેક્ટર નરેન્દ્ર મોહનના જણાવ્યા અનુસાર, ખાંડમાં GI એટલે કે ગ્લાયસેમિક ઇન્ડેક્સ જેટલો ઓછો હશે, તે લોહીમાં સુગર લેવલને ઓછી અસર કરશે. તેથી જ સંસ્થાએ એવી ખાંડની શોધ કરી છે જેનું GI ખૂબ ઓછું છે અને તેનો ઉપયોગ કૃત્રિમ ખાંડની જગ્યાએ કરી શકાય છે.

આ ખાંડ બનાવવા માટે શેરડીના રસને કુદરતી રીતે શુદ્ધ કરીને લો જીઆઈ દાણાદાર ખાંડ તૈયાર કરવામાં આવે છે. આ ખાંડમાં વિટામિન A, વિટામિન B12, મેગ્નેશિયમ, ઝિંક વગેરે જેવા ઘણા પ્રકારના વિટામિન્સ પણ ઉમેરી શકાય છે. ડાયાબિટીસ ઉપરાંત, ઓછા જીઆઈ ઇન્ડેક્સવાળા ઉત્પાદનો પણ કોલેસ્ટ્રોલ, બીપી વગેરે ઘટાડવામાં મદદરૂપ થાય છે.

સંસ્થા દ્વારા છેલ્લા ચાર વર્ષથી આ ખાંડ પર સંશોધન કરવામાં આવી રહ્યું છે. સંસ્થા દ્વારા તેના ટેકનિકલ સંશોધનની પેટન્ટ માટે અરજી પણ કરવામાં આવી છે. તેને બનાવનાર ટીમમાં અનુષ્કા કનોડિયા સાથે શ્રુતિ શુક્લા, સ્વેચ્છા સિંહનો સમાવેશ થાય છે. એવી અપેક્ષા છે કે તે આવતા વર્ષે એપ્રિલ સુધીમાં બજારમાં આવી જશે.

ભારતમાં દર વર્ષે ડાયાબિટીસના કેસ વધી રહ્યા છે.ડાયાબિટીસના દર્દીઓની સંખ્યા 10 કરોડથી વધુ છે. ખાવાની ખોટી આદતો અને ખરાબ જીવનશૈલીના કારણે આ બીમારી વધી રહી છે. હવે બાળકો પણ ડાયાબિટીસનો શિકાર બની રહ્યા છે. ડાયાબિટીસના કારણે શરીરના બીજા ઘણા અંગો પણ પ્રભાવિત થઈ રહ્યા છે. જેના કારણે કિડની, હૃદય અને આંખો જેવી અનેક બીમારીઓનો ખતરો રહે છે. ડાયાબિટીસને કારણે અન્ય કોઈ રોગ પણ શરીરમાં ગંભીર બની જાય છે. આવી સ્થિતિમાં તેની સામે રક્ષણ કરવું જરૂરી છે. ડૉક્ટરો સલાહ આપે છે કે ડાયાબિટીસના દર્દીઓએ તેમના આહારનું ધ્યાન રાખવું જોઈએ અને દરરોજ કસરત કરવી જોઈએ.