ગયા વર્ષે 18 નવેમ્બરે ઉત્તર પ્રદેશ સરકારે હલાલ પ્રમાણિત ઉત્પાદનોના ઉત્પાદન, વેચાણ, સંગ્રહ અને વિતરણ પર પ્રતિબંધ મૂક્યો હતો. હવે સુપ્રીમ કોર્ટ આને પડકારતી હલાલ ઈન્ડિયા પ્રાઈવેટ લિમિટેડની રિટ અરજી પર સુનાવણી કરી રહી છે. આ કેસની સુનાવણી જસ્ટિસ બીઆર ગવઈ અને સંદીપ મહેતાની બેન્ચ કરી રહી છે.

ઉત્તર પ્રદેશમાં હલાલ પ્રમાણપત્ર વિરુદ્ધ નોંધાયેલા કેસમાં હલાલ ઈન્ડિયા પ્રાઈવેટ લિમિટેડ કંપની દ્વારા દાખલ કરવામાં આવેલી અરજી પર સુપ્રીમ કોર્ટે યુપી સરકારને નોટિસ પાઠવી છે. તેમજ બે સપ્તાહમાં જવાબ આપવા જણાવ્યું હતું. ગયા વર્ષે નવેમ્બરમાં, યુપી પોલીસે નકલી હલાલ પ્રમાણપત્રોનું વિતરણ કરવા બદલ આ કંપની સહિત ઘણી સંસ્થાઓ વિરુદ્ધ FIR નોંધી હતી.

તેમના પર આર્થિક નફો મેળવવા માટે લોકોની ધાર્મિક લાગણીઓ સાથે રમવાનો આરોપ છે. હલાલ ઈન્ડિયા પ્રાઈવેટ લિમિટેડ કંપનીએ સુપ્રીમ કોર્ટમાં તેની સામે ચાલી રહેલી ફોજદારી કાર્યવાહીને રદ કરવાની માંગ કરી છે. અહીં કોર્ટે યુપીમાં હલાલ પ્રમાણપત્ર પર પ્રતિબંધ મૂકવા અંગે રાજ્ય સરકાર અને FSSAI પાસેથી જવાબ માંગ્યો છે. 

અરજદારના વકીલે આ કેસમાં આંતરરાજ્ય વેપાર પર અસરનો ઉલ્લેખ કર્યો છે. વકીલે એવો પણ દાવો કર્યો હતો કે વિવિધ રાજ્યોમાં રાજકીય પક્ષોના સભ્યો દ્વારા આવી ફરિયાદો દાખલ કરવામાં આવી રહી છે અને ત્યાં પણ ઉત્તર પ્રદેશની જેમ કવાયત શરૂ કરવાની વિનંતી કરવામાં આવી રહી છે. અરજદારે કહ્યું કે આ મામલો ખૂબ જ મહત્વપૂર્ણ છે અને કોર્ટનું ધ્યાન દોરવું જરૂરી છે.