પાપુઆ ન્યુ ગિનીના મોરેસ્બી અને તિબેટના શિજાંગમાં ભૂકંપના આંચકા અનુભવાયા છે. નેશનલ સેન્ટર ફોર સિસ્મોલોજી અનુસાર, તિબેટના શિજાંગમાં ભૂકંપની તીવ્રતા રિક્ટર સ્કેલ પર 4.2 માપવામાં આવી હતી. આ ભૂકંપ તિબેટના શિજાંગમાં રાત્રે 1.12 વાગ્યે આવ્યો હતો. ભૂકંપનું કેન્દ્રબિંદુ 10 કિમીની ઉંડાઈએ હતું. આ ભૂકંપના કારણે જાનમાલના નુકસાનના કોઈ સમાચાર હાલ સુધી પ્રાપ્ત થયા નથી.

તો બીજી બાજુ અગાઉ પાપુઆ ન્યુ ગિનીના મોરેસ્બીમાં પણ ભૂકંપ આવ્યો હતો. ભારતીય સમય અનુસાર રાત્રે 11.34 મિનિટે પાપુઆ ન્યુ ગિનીના મોરેસ્બીમાં ભૂકંપના જોરદાર આંચકા અનુભવાયા હતા. તેની તીવ્રતા રિક્ટર સ્કેલ પર 7.2 નોંધાઈ હતી. ભૂકંપનું કેન્દ્રબિંદુ 80 કિમીની ઊંડાઈએ હતું.

ભૂકંપથી ઇન્ડોનેશિયાની સરહદથી લગભગ 100 કિલોમીટર પૂર્વમાં ન્યૂ ગિની ટાપુ પરનો વિસ્તાર હચમચી ગયો હતો. આ વર્ષની શરૂઆતમાં એટલે કે ફેબ્રુઆરીના અંતમા પૂર્વીય પાપુઆ ન્યુ ગિનીના એક દ્વીપસમૂહનો કેટલોક ભાગ, દૂરસ્થ ન્યુ બ્રિટનમાં 6.2 તીવ્રતાનો ભૂકંપ આવ્યો હતો.