ભારત ફોર્જના ચેરમેન બાબાસાહેબ કલ્યાણી વિરુદ્ધ બહેનના સંતાનોએ કર્યો કેસ : ભારત ફોર્જ અને કલ્યાણી સ્ટીલમાં હિસ્સો અને પરિવારની સંપત્તિનો માંગ્યો નવમો ભાગ

ભારત ફોર્જના ચેરમેન બાબાસાહેબ કલ્યાણી અને તેમની બહેન સુગંધા વચ્ચેની સંપત્તિના વિવાદમાં હવે નવો વળાંક આવ્યો છે. સુગંધા અને જય હિરેમથના બાળકો સમીર હિરેમઠ અને પલ્લવી સ્વાદીએ તેમના કાકા બાબા કલ્યાણી વિરુદ્ધ પારિવારિક સંપત્તિના વિભાજન માટે પૂણે સિવિલ કોર્ટમાં અરજી કરી છે. તેણે પોતાના હિસ્સા તરીકે ભારત ફોર્જ અને કલ્યાણી સ્ટીલમાં હિસ્સો સહિત પરિવારની સંપત્તિનો નવમો ભાગ માંગ્યો છે. ફોર્બ્સ અનુસાર, બાબા, દેશના સૌથી અમીર લોકોમાંના એક છે, જેની કુલ સંપત્તિ 4 બિલિયન ડોલર છે.

કલ્યાણી ગ્રૂપની કંપની હિકલના નિયંત્રણને લઈને સુગંધા હિરેમથ અને બાબા કલ્યાણી વચ્ચેના સંબંધો તૂટી ગયા. સુગંધાએ 2023 માં બોમ્બે હાઈકોર્ટમાં એવો આક્ષેપ કર્યો હતો કે બાબાસાહેબ કલ્યાણી ફેમેલી અરેંજમેન્ટનું સન્માન કરતા નથી જેમાં હિકલના તમામ શેર તેમને ટ્રાન્સફર કરવાનું વચન આપ્યું હતું. બાબા કલ્યાણીએ જણાવ્યું હતું કે 1994ની ફેમેલી અરેંજમેન્ટ તેમના પિતા નીલકંઠ કલ્યાણી દ્વારા માત્ર એક "નોંધ" હતી અને કાયદાકીય રીતે બંધનકર્તા દસ્તાવેજ નથી. આ કેસ કોર્ટમાં પેન્ડિંગ છે. પ્રવક્તાએ કહ્યું કે, "તેથી અમારા પર કરવામાં આવેલા કોઈપણ દાવા/આક્ષેપો પર ટિપ્પણી કરવી અમારા તરફથી ઉતાવળ ગણાશે. જે આરોપોનો ઉલ્લેખ કરવામાં આવ્યો છે તે હકીકતમાં ખોટા છે, ખોટી ધારણા છે અને તે ખોટા હેતુઓ સાથેનો એક દૂષિત પ્રયાસ છે. વિવિધ દાવાઓ અન્ય કાનૂની કાર્યવાહીમાં અરજદાર પરિવારના વલણનો વિરોધાભાસ કરે છે.”

જયારે સમીર અને પલ્લવી હિરેમથે તેમની રજૂઆતમાં જણાવ્યું હતું કે, બાબા કલ્યાણી એચયુએફની સંપત્તિનો એકમાત્ર લાભ ઉઠાવી રહ્યા છે અને બાકીના પરિવાર સાથે તેમના વિશેની માહિતી શેર કરી નથી. તેઓએ જણાવ્યું હતું કે કલ્યાણી પરિવારની સંપત્તિઓ એક સફળ ઉદ્યોગપતિ અને કૃષિવાદી, પરદાદા અન્નપ્પા એન કલ્યાણીના પ્રયત્નોને કારણે બનાવવામાં આવી હતી. કલ્યાણી ગ્રૂપમાં ₹69,300 કરોડની સંયુક્ત માર્કેટ મૂડી સાથે આઠ લિસ્ટેડ કંપનીઓનો સમાવેશ થાય છે. જેમાં ભારત ફોર્જ ₹52,636 કરોડના મૂલ્યાંકન સાથે પ્રભુત્વ ધરાવે છે, તેમાં કલ્યાણી ગ્રૂપનો 45.25% હિસ્સો છે. ગઈકાલના માર્કેટના અંતે હિકલનું બજાર મૂલ્ય ₹3,324 કરોડ હતું. દાવામાં જણાવવામાં આવ્યું હતું કે અન્નપ્પા કલ્યાણીએ વિવિધ વ્યવસાયોમાં કુટુંબના ભંડોળનું રોકાણ કર્યું હતું. આ કંપનીઓ અથવા ભાગીદારી પેઢીના રૂપમાં હતી, નીલકંઠ કલ્યાણીએ પારિવારિક વ્યવસાયોમાં સક્રિયપણે ભાગ લીધો હતો.

સૂટમાં કહેવામાં આવ્યું છે કે હવે ફેમિલી પૂલમાં રહેલી દરેક વસ્તુ, સંપત્તિ કોના નામે છે તે ધ્યાનમાં લીધા વિના, એચયુએફનો ભાગ છે અને તેથી વિભાજન દરમિયાન ધ્યાનમાં લેવામાં આવશે. હિંદુ ઉત્તરાધિકાર અધિનિયમ, 1956 ની કલમ 6 માં 2005ના સુધારાના આધારે તેઓ કલ્યાણી ફેમિલી એચયુએફમાં સહભાગી હોવાનું જણાવીને ભાઈ-બહેનોએ તેમના અધિકાર પર ભાર મૂક્યો છે. જે મુજબ તેઓ કલ્યાણી પરિવાર એચયુએફનું વિભાજન મેળવવાના તેમના અધિકારોમાં છે. સૂટમાં અવિભાજિત પરિવારની માલિકીની સંપત્તિના ભાગ રૂપે કેટલીક લિસ્ટેડ અને પ્રાઇવેટ લિમિટેડ કંપનીઓ, ફર્મ્સ, પ્રોપ્રાઇટરશિપ ફર્મ્સ, અન્ય કંપનીઓના શેર્સ, ઈમમૂવેબલ પ્રોપર્ટી, બેંક ખાતાઓ અને મિલકતો સૂચિબદ્ધ છે. દાવામાં કહેવાયું છે કે, "જ્યારથી આ તમામ વ્યવસાયો શરૂ કરવામાં આવ્યા હતા અને શ્રી અન્નપ્પા કલ્યાણીની આગેવાની હેઠળના સંયુક્ત કુટુંબના ન્યુક્લિયસમાંથી રોકાણ કરવામાં આવ્યું હતું, એટલા માટે આ તમામ વ્યવસાયો અને રોકાણો સંયુક્ત કુટુંબની મિલકતો છે." 

2011માં જ્યારે નીલકંઠ કલ્યાણીની તબિયત બગડવા લાગી, ત્યારે તેમના મોટા પુત્ર બાબાએ એચયુએફની બાબતોનું સંચાલન કરવાનું શરૂ કર્યું. 2013માં નીલકંઠનું અવસાન થયું હતું. બાબાએ પરિવારની સંપત્તિનો વિસ્તાર કરીને ગ્રુપને નવી ઊંચાઈઓ પર લઈ ગયા. ઉદાહરણ તરીકે, કલ્યાણી ગ્રૂપની ફ્લેગશિપ કંપની ભારત ફોર્જની સ્થાપના નીલકંઠે 1966માં કરી હતી, પરંતુ તે બાબા છે જેમણે ઓટો અને એરોસ્પેસ કમ્પોનન્ટ નિર્માતા કંપનીનું નિર્માણ કર્યું જેનું બજાર મૂલ્ય આજે રૂ. 52,636 કરોડ છે.