કોલકાતાની આરજી કાર મેડિકલ કોલેજમાં એક મહિલા ડૉક્ટર પર બળાત્કાર અને હત્યાના વિરોધમાં ગત રાત્રે 11:55 કલાકે દેશમાં અનેક જગ્યાએ 'રિક્લેમ ધ નાઈટ' નામના વિરોધ પ્રદર્શનો શરૂ થયા હતા. આ પ્રદર્શનને આઝાદીની મધ્યરાત્રિમાં મહિલાઓની સ્વતંત્રતા માટેના પ્રદર્શનનું નામ આપવામાં આવ્યું હતું. કોલકાતામાં આયોજિત વિરોધ થોડી જ વારમાં હિંસક બની ગયો હતો.

મધ્યરાત્રિએ અહીં સ્થિતિ વધુ વણસી હતી જ્યારે ગુસ્સે ભરાયેલા ટોળાઓ બેરિકેડ તોડીને હોસ્પિટલના ઈમરજન્સી બિલ્ડિંગમાં ઘૂસી ગયા હતા. રાત્રે લગભગ 12 કલાકે હોસ્પિટલમાં ભારે તોડફોડ કરવામાં આવી હતી. ડોક્ટરોને માર મારવામાં આવ્યો હતો. હોસ્પિટલ પરિસરમાં જે સ્થાન પર પ્રદર્શનકારી ડોક્ટરો ધરણા કરી રહ્યા હતા તે સ્થાને પણ ઉપદ્રવીઓએ તોડફોડ કરી અને ખુરશીઓ અને પંખા તોડી નાખ્યા હતા.

આ ટોળાએ અચાનક હોસ્પિટલ પર હુમલો કર્યો. ઇમરજન્સી બિલ્ડિંગ જ્યાં મહિલા ડૉક્ટર પર બળાત્કાર અને હત્યા કરવામાં આવી હતી તેના પર પણ હુમલો કરવામાં આવ્યો હતો. ઈમારતના દરેક ખૂણામાં ગુનાના પુરાવા છુપાયેલા હતા. આ જ ઈમારતને મોડી રાત્રે તોડી પાડવામાં આવી હતી. ગુસ્સે થયેલા ટોળાને વિખેરવા પોલીસે લાઠીચાર્જ કર્યો અને ટીયર ગેસના શેલ છોડ્યા હતા. આ દરમિયાન કેટલાક પોલીસકર્મીઓ પણ ઈજાગ્રસ્ત થયા હતા.

કોલકાતા પોલીસનું કહેવું છે કે, કેટલાક અજાણ્યા બદમાશોએ આરજી કાર મેડિકલ કોલેજમાં તોડફોડ કરી હતી. દેખાવકારોમાં લગભગ 40 લોકોનું જૂથ હતું. આ જ લોકોએ હોસ્પિટલમાં હિંસા કરી હતી. આ દરમિયાન પોલીસના વાહનો અને કેટલાક ટુ-વ્હીલર્સને પણ નુકસાન થયું હતું. ભીડને કાબૂમાં લેવા માટે લાઠીચાર્જ અને ટીયર ગેસના શેલનો ઉપયોગ કરવો પડ્યો હતો.

કોલકાતા પોલીસ કમિશનરનું નિવેદન

કોલકાતાના પોલીસ કમિશનર વિનીત ગોયલે કહ્યું, 'હોસ્પિટલમાં તૈનાત પોલીસકર્મીઓની સંખ્યા ઓછી હતી જેના કારણે ઉશ્કેરાયેલી ભીડને નિયંત્રિત કરી શકાઈ ન હતી. પોલીસે ભીડને કાબૂમાં લેવા માટે લાઠીચાર્જ કર્યો અને ટીયર ગેસના શેલ છોડ્યા. મહિલા તબીબના બળાત્કાર અને હત્યા કેસમાં પોલીસે પુરી તાકાતથી કામ કર્યું હતું, પરંતુ સતત અફવાઓ ફેલાવાથી પરિસ્થિતિ કાબૂ બહાર ગઈ હતી.

ભાજપનો આરોપ- TMCએ ગુંડા મોકલ્યા હતા

બીજેપી નેતા સુવેન્દુ અધિકારીએ પોસ્ટ કરતા લખ્યું કે, 'મમતા બેનર્જીએ તેમના ટીએમસીના ગુંડાઓને મેડિકલ કોલેજ અને હોસ્પિટલ નજીક બિનરાજકીય વિરોધ રેલીમાં મોકલ્યા છે. તેણી વિચારે છે કે તે આખી દુનિયાની સૌથી ચતુર વ્યક્તિ છે અને લોકો આ યુક્તિને સમજી શકશે નહીં કે તેના ગુંડાઓ વિરોધીઓ તરીકે ઉભા થઈને ભીડ સાથે ભળી જશે અને મેડિકલ કોલેજ અને હોસ્પિટલની અંદર નિર્દયતા કરશે. તેઓને પોલીસ દ્વારા સલામત માર્ગ આપવામાં આવ્યો હતો, જેઓ કાં તો ભાગી ગયા હતા અથવા દૂર જોઈ રહ્યા હતા જેથી આ ગુંડાઓ હોસ્પિટલના પરિસરમાં પ્રવેશી શકે અને મહત્વપૂર્ણ પુરાવા ધરાવતા વિસ્તારોનો નાશ કરી શકે જેથી સીબીઆઈ તેને પકડી ન શકે.'

કોલકાતા પોલીસ પર સવાલ

સવાલો ઉઠી રહ્યા છે કે, આટલો મોટો હિંસક વિરોધ શા માટે થવાનો હતો પરંતુ કોલકાતા પોલીસને તેના વિશે કોઈ પુરાવા કેમ ન મળ્યો. આર.જી.કોલેજની બહાર હજારોની સંખ્યામાં લોકોના ટોળા ઉમટી રહ્યા હતા, તો સમયસર કાર્યવાહી કેમ ન કરાઈ? આરજી કાર હોસ્પિટલના ડૉક્ટરોનું કહેવું છે કે પોલીસ તેમને સુરક્ષા આપવામાં નિષ્ફળ રહી છે.