સંબંધિત પક્ષના ટ્રાનઝેકશનમાં નિયમોના ઉલ્લંઘન સહિતના અનેક આરોપો : 31 માર્ચે પૂરા થયેલા ક્વાર્ટરમાં પણ મળી બે કારણ બતાવો નોટિસો 

સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) એ અદાણી ગ્રુપની છ કંપનીઓને કારણ બતાવો નોટિસ પાઠવી છે. આ કંપનીઓ પર સંબંધિત પક્ષના વ્યવહારોના કથિત ઉલ્લંઘન, લિસ્ટિંગ નિયમોનું પાલન ન કરવા અને ઓડિટર પ્રમાણપત્રોની માન્યતા અંગે આરોપ લગાવવામાં આવ્યા છે. આ કંપનીઓએ સ્ટોક એક્સચેન્જને આપવામાં આવેલી રેગ્યુલેટરી ફાઈલિંગમાં આ માહિતી આપી છે. ભારત અને એશિયાના બીજા સૌથી ધનિક વ્યક્તિ ગૌતમ અદાણીની આગેવાની હેઠળની ગ્રુપની મુખ્ય કંપની અદાણી એન્ટરપ્રાઇઝે ગુરુવારે જણાવ્યું હતું કે તેને 31 માર્ચે પૂરા થયેલા ક્વાર્ટર માટે બે કારણ બતાવો નોટિસો મળી છે. આ ઉપરાંત અન્ય ગ્રુપ કંપનીઓ અદાણી પોર્ટ્સ અને સ્પેશિયલ ઈકોનોમિક ઝોન, અદાણી પાવર, અદાણી એનર્જી સોલ્યુશન્સ, અદાણી વિલ્મર અને અદાણી ટોટલ ગેસને પણ કારણ બતાવો નોટિસો મળી છે.

આ કંપનીઓનું કહેવું છે કે તેમને મળેલા કાનૂની અભિપ્રાય મુજબ સેબીની નોટિસની તેમના પર કોઈ અસર થવાની શક્યતા નથી. જો કે, અદાણી વિલ્મર અને અદાણી ટોટલ ગેસ સિવાયની તમામ કંપનીઓના ઓડિટર્સે યોગ્ય અભિપ્રાય જારી કર્યો છે. આ મુજબ, સેબીની તપાસના પરિણામો ભવિષ્યમાં આ કંપનીઓના નાણાકીય નિવેદનોને અસર કરી શકે છે. અમેરિકન શોર્ટ સેલિંગ ફર્મ હિંડનબર્ગ રિસર્ચ દ્વારા અદાણી ગ્રૂપ સામે કરાયેલા આરોપોની સેબીની તપાસ બાદ આ નોટિસ જારી કરવામાં આવી છે. 

સેબીએ આ કંપનીઓને પૂછ્યું છે કે તેમની સામે નાણાકીય અને કાયદાકીય પગલાં કેમ ન લેવા જોઈએ? ત્યાંરે અદાણી પોર્ટ્સ અને એસઇઝેડએ જણાવ્યું હતું કે એવો આક્ષેપ છે કે કંપનીએ જરૂરી મંજૂરીઓ મેળવી નથી અને નાણાકીય નિવેદનો/વાર્ષિક અહેવાલમાં જરૂરી જાહેરાતો કરી નથી. સમાપ્ત થયેલા કોન્ટ્રેક્ટ્સ માટે સિક્યોરિટી ડિપોઝિટનું રિફંડ ન થવાના પરિણામે કંપનીના મુખ્ય વ્યવસાયિક હેતુઓ માટે ભંડોળનો ઉપયોગ થતો નથી અને તેથી તે કંપનીની આચારસંહિતાનું પાલન કરતું નથી. અદાણી પાવરે કહ્યું કે તેણે સેબીની નોટિસનો જવાબ આપ્યો છે. સેબીએ આક્ષેપ કર્યો છે કે સંબંધિત વર્ષોના નાણાકીય નિવેદનોમાં ચોક્કસ વ્યવહારોની જાણ કરવામાં આવી ન હતી અને આવા વ્યવહારો માટે જરૂરી મંજૂરીઓ લેવામાં આવી ન હતી.

સેબીએ ઓગસ્ટમાં સુપ્રીમ કોર્ટમાં રજૂ કરેલા તેના અહેવાલમાં જણાવ્યું હતું કે તેણે 13 સંબંધિત પક્ષકારોના વ્યવહારોની ઓળખ થઈ છે, જેની તપાસ કરવામાં આવી રહી છે. જાન્યુઆરી 2023 હિન્ડેનબર્ગ રિપોર્ટમાં 6,000 થી વધુ સંબંધિત ટ્રાનઝેકશન પર પ્રશ્નો ઉભા થયા છે. આ પછી અદાણી ગ્રુપના શેરમાં ભારે ઘટાડો જોવા મળ્યો હતો. જો કે, ગ્રુપે આ આરોપોને નકારી કાઢ્યા હતા. તાજેતરના દિવસોમાં ગ્રુપના શેરમાં વધારો થયો છે અને હિન્ડેનબર્ગ ગ્રૂપના અહેવાલને કારણે થયેલા મોટા ભાગના નુકસાનને વસૂલ્યું છે. અદાણી હાલમાં 99.1 અબજ ડોલરની સંપત્તિ સાથે વિશ્વના સૌથી ધનિક લોકોની યાદીમાં 13મા ક્રમે છે. આ વર્ષે તેની નેટવર્થ 14.8 બિલિયન ડોલર વધી છે.