ભારતની સ્પેસ એજન્સી ISROના અધ્યક્ષ એસ સોમનાથે કહ્યું છે કે સ્પેસ એજન્સી પર દરરોજ 100 થી વધુ સાયબર હુમલા થઈ રહ્યા છે. સાયબર હુમલાની આ ઘટનાઓ એવા સમયે બની રહી છે જ્યારે ઈસરો દરરોજ સફળતાની નવી ઊંચાઈઓ હાંસલ કરી રહ્યું છે. જો કે, ગભરાવાની જરૂર નથી, કારણ કે ISRO આવા હુમલાઓનો સામનો કરવા માટે મજબૂત સાયબર સુરક્ષા નેટવર્કથી સજ્જ છે.

કેરળના કોચી શહેરમાં બે દિવસીય આંતરરાષ્ટ્રીય સાયબર કોન્ફરન્સ C0c0nની 16મી સીઝનના કાર્યક્રમને સંબોધતા સોમનાથે કહ્યું કે રોકેટ ટેક્નોલોજીમાં સાયબર હુમલાની શક્યતા ઘણી વધારે છે. આ ટેક્નોલોજીઓ હાર્ડવેર આધારિત છે અને અત્યાધુનિક સોફ્ટવેર અને ચિપ્સનો ઉપયોગ કરે છે.


ISRO ચીફે કહ્યું કે સોફ્ટવેર સિવાય, ISRO હવે રોકેટની અંદર હાર્ડવેર ચિપની સુરક્ષા પર ધ્યાન કેન્દ્રિત કરીને વિવિધ પરીક્ષણો પર પણ આગળ વધી રહ્યું છે. તેમણે કહ્યું કે ISRO પાસે ઉપગ્રહો પણ છે જે સામાન્ય લોકોના રોજિંદા જીવનમાં મદદ કરે છે. આ બધા વિવિધ પ્રકારના સોફ્ટવેર દ્વારા નિયંત્રિત થાય છે. આ બધાની સુરક્ષા માટે સાયબર સુરક્ષા ખૂબ જ મહત્વપૂર્ણ છે.


ટેકનોલોજી વરદાન અને જોખમ બંને છે. આપણે આર્ટિફિશિયલ ઈન્ટેલિજન્સ જેવી ટેક્નોલોજીનો ઉપયોગ કરીને સાયબર ગુનેગારો દ્વારા ઊભા કરવામાં આવતા પડકારોનો સામનો કરી શકીએ છીએ. આ દિશામાં સંશોધન અને મહેનત થવી જોઈએ.