વડા પ્રધાન નરેન્દ્ર મોદીના નેતૃત્વ હેઠળ, ખાદી અને ગ્રામોદ્યોગ આયોગ (KVIC), ભારત સરકારના સૂક્ષ્મ, લઘુ અને મધ્યમ ઉદ્યોગ મંત્રાલયે વર્ષ 2023 - 24 માં ઉત્પાદન, વેચાણ અને નવી રોજગાર સર્જનમાં નવો રેકોર્ડ બનાવ્યો છે. મંગળવારે KVICના અધ્યક્ષ મનોજ કુમારે રાજઘાટ, નવી દિલ્હી ખાતેની તેમની ઓફિસમાં નાણાકીય વર્ષ 2023-24 માટે કામચલાઉ આંકડાઓ જાહેર કર્યા છે. 

અગાઉના તમામ આંકડાઓને પાછળ છોડીને, નાણાકીય વર્ષ 2013 ની સરખામણીમાં વેચાણમાં 399.69 ટકા (આશરે 400%), ઉત્પાદનમાં 314.79 ટકા (અંદાજે 315%) વધારો અને નવી રોજગારી સર્જનમાં 80.96 ટકા (અંદાજે 81%) વધારો થયો છે. નાણાકીય વર્ષ 2022-23માં વર્ષ 2013-14ની સરખામણીમાં વેચાણમાં 332.14%, ઉત્પાદનમાં 267.52% અને નવી રોજગાર સર્જનમાં 69.75%નો વધારો થયો છે.

KVICના આ ઉત્કૃષ્ટ પ્રદર્શને વર્ષ 2047 સુધીમાં 'વિકસિત ભારત'ના ઠરાવને સાકાર કરવામાં અને ભારતને વિશ્વની ત્રીજી અર્થવ્યવસ્થા બનાવવામાં મોટો ફાળો આપ્યો છે. સ્વતંત્ર ભારતના ઈતિહાસમાં પ્રથમ વખત KVIC ઉત્પાદનોનું વેચાણ રૂ. 1.55 લાખ કરોડને વટાવી ગયું છે. નાણાકીય વર્ષ 2022-23 માટે વેચાણનો આંકડો 1.34 લાખ કરોડ રૂપિયા હતો. 

છેલ્લા 10 નાણાકીય વર્ષોમાં, ગ્રામીણ વિસ્તારોમાં કારીગરો દ્વારા બનાવવામાં આવેલી સ્વદેશી ખાદી અને ગ્રામ્ય ઉદ્યોગ ઉત્પાદનોનું વેચાણ નાણાકીય વર્ષ 2013-14માં રૂ. 31154.20 કરોડ હતું, જ્યારે આ વર્ષમાં તે વધીને રૂ. 155673.12 કરોડ થશે, જે અત્યાર સુધીની શ્રેષ્ઠ સિદ્ધિ છે. નાણાકીય વર્ષ 2023-24માં, KVICના પ્રયાસોએ ગ્રામીણ વિસ્તારોમાં 10.17 લાખ નવી નોકરીઓનું સર્જન કર્યું છે, જેણે ગ્રામીણ ભારતની અર્થવ્યવસ્થાને મજબૂત બનાવી છે.

ખાદીના કપડાંના ઉત્પાદનમાં પણ છેલ્લા 10 વર્ષમાં અભૂતપૂર્વ વૃદ્ધિ જોવા મળી છે. નાણાકીય વર્ષ 2013-14માં ખાદીના કપડાંનું ઉત્પાદન રૂ. 811.08 કરોડ હતું, તે નાણાકીય વર્ષ 2023-24માં 295.28 ટકાના ઉછાળા સાથે રૂ. 3206 કરોડે પહોંચ્યું હતું, જે અત્યાર સુધીનું શ્રેષ્ઠ પ્રદર્શન છે. નાણાકીય વર્ષ 2022-23માં ખાદીના કપડાંનું ઉત્પાદન 2915.83 કરોડ રૂપિયા હતું.