અત્રે નોંધનીય છે કે, જામનગર જિલ્લામાં ચોમાસુ પાકમાં મુખ્યત્વે કપાસ, મગફળી, તલ, સોયાબીન સહીતના તેલીબીયાના પાક તથા શાકભાજી, ફળનો સમાવેશ થાય છે. પરંતુ ડીઝલ ન મળતાં આ તમામ પાકના વાવેતર પર માઠી અસર પડશે તેમાં બેમત નથી. આટલું જ નહીં જિલ્લાના ખેડૂતોએ ૬૦-૬૦ કીમી સુધી ધકકા ખાવા છતાં પેટ્રોલપંપો પરથી ડીઝલ ન મળતું હોવાનું રોષભેર જણાવ્યું હતું. આથી કમોસમી વરસાદની જેમ ડીઝલની અછતથી ખેડૂતોને ભારે આર્થિક ફટકો પડે તો નવાઇ નહીં. 

ચોમાસુ પાકના આગોતરા વાવેતર પર બ્રેક, ૧૦ થી ૧૫ લીટર ડીઝલ મળતું નથી

લાલપુર તાલુકાના ખડબા ગામના ખેડૂત આદમભાઇ સપીયાએ જણાવ્યું હતું કે, દૂર-દૂર સુધી ધકકા ખાવા છતાં પેટ્રોલ પંપો પરથી ૧૦ થી ૧૫ લીટર ડીઝલ મળતું નથી. આથી ચોમાસુ પાકના આગોતરા વાવેતર પર બ્રેક લાગી ગઇ છે. વાવણીની મોટાભાગની કામગીરી ઠપ્પ થઇ છે. જમીન ખેડ કરી શકાતી નથી તો જે ખેડૂતોએ જમીન ખેડ કરી લીધી હોય તેઓ ડીઝલ ન મળતા વાવેતર કરી શકતા નથી. જે ખેડૂતને જેટલી જમીન હોય તે પ્રમાણમાં વાવણી સહીતના કાર્યો માટે તેટલા ડીઝલની જ‚ર પડે છે. પરંતુ હાલમાં ડીઝલની અછતથી ખેતી કરવી એક મોટો પડકાર બન્યો છે. ​​​​​​​

ખેતીમાં કામ અટકી પડતા ભારે હાલાકી, ડીઝલ મળતું નથી, કયાં ફરિયાદો કરવી

ધુડશીયા ગામના ખેડૂત બાબુભાઇ કામાણીએ જણાવ્યું હતું કે, હાલમાં ખેતીમાં ઉનાળુ પિયતા કાઢેલું હોય આથી ચોમાસુ પાકની વાવણીનો સમય છે. પરંતુ ડીઝલ ન મળતા જમીન ખેડવી, વાવેતર કરવું સહીતની તમામ પ્રક્રીયા અટકી ગઇ છે. કારણ કે, મોટાભાગની કામગીરી ડીઝલ આધારીત વાહનો દ્વારા કરવામાં આવે છે. કતારોમાં કલાકો સુધી ઉભા રહેવા છતાં ડીઝલ મળતું નથી આથી ફરિયાદો કયાં કરવી?, ડીઝલ ન મળતાં ખેતીમાં કામ અટકી પડતા ભારે હાલાકી પડી રહી છે. ​​​​​​​