ચૂંટણી પંચે મંગળવારે લોકસભા ચૂંટણીના બે તબક્કાના મતદાનના આંકડા જાહેર કર્યા. પ્રથમ તબક્કામાં 21 રાજ્યો અને કેન્દ્રશાસિત પ્રદેશોની 102 બેઠકો પર મતદાનની ટકાવારી 66.17 ટકા હતી અને બીજા તબક્કામાં 13 રાજ્યો અને કેન્દ્રશાસિત પ્રદેશોની 88 બેઠકો પર 66.71 ટકા મતદાન થયું હતું.

પ્રથમ તબક્કામાં લક્ષદ્વીપમાં સૌથી વધુ 84 ટકા મતદાન થયું હતું જ્યારે પશ્ચિમ બંગાળમાં 81.91 ટકા મતદાન થયું હતું. જ્યારે બીજા તબક્કામાં સૌથી વધુ 84 ટકા મતદાન મણિપુરમાં અને 81.17 ટકા આસામમાં થયું હતું. ચૂંટણી પંચે લોકસભા ચૂંટણીના બંને તબક્કાના અત્યાર સુધીના અંતિમ આંકડાઓ જાહેર કર્યા છે, એવા સમયે જ્યારે કોંગ્રેસ અને તૃણમૂલ કોંગ્રેસ દ્વારા અત્યાર સુધી અંતિમ મતદાનના આંકડા જાહેર ન કરવા અંગે સવાલો ઉભા થયા છે.

લોકસભા ચૂંટણીમાં કુલ 67.40 ટકા મતદાન
​​​​​​​

આ સાથે પંચે 2019ના મતદાનના આંકડા પણ જાહેર કર્યા છે. તે સમયે લોકસભા ચૂંટણીમાં કુલ 67.40 ટકા મતદાન થયું હતું. 2019માં લક્ષદ્વીપમાં સૌથી વધુ 85 ટકા અને મિઝોરમમાં 83 ટકા મતદાન થયું હતું. આયોગના ડેટા અનુસાર આ વખતે 2019ની સરખામણીએ મતદાન થોડું ઓછું થયું છે જો કે તેની પાછળ મતદાન યાદીની પારદર્શિતા પણ એક મોટું કારણ હોવાનું કહેવાય છે. પંચે આ વખતે મતદાર યાદીમાંથી 1.68 કરોડ નકલી અને ડુપ્લિકેટ નામો પણ દૂર કર્યા છે.