ગુજરાતમાં 1 મેથી 18+નું રસીકરણ શરૂ થવા અંગે શંકા: સરકારને નથી મળ્યો જરી જથ્થો

  • April 30, 2021 02:40 AM 
Aajkaal Daily (Desh Pardesh Ni Aajkaal)

રાજ્ય સરકારે 1.50 કરોડ ડોઝનો ઓર્ડર આપ્યો છે પરંતુ હજી જથ્થો મળ્યો નથી: અંદાજ મુજબ 18થી 45ના વયજૂથ માટે 6.50 કરોડ ડોઝની જરૂર પડશે

 


મુખ્યમંત્રી વિજય રૂપાણીએ હાલમાં જ જાહેરાત કરી હતી કે, રાજ્યમાં 1 મેથી 18 વર્ષથી ઉપરના તમામ લોકો માટે વેક્સીનેશન ડ્રાઈવ શરૂ થશે. જો કે, આરોગ્ય વિભાગના અધિકારીઓ ચિંતામાં છે કારણકે રાજ્યને હજી સુધી વેક્સીનનો જરૂરી જથ્થો મળ્યો નથી.

 


બુધવારથી 18થી વધુ વયના લોકો માટે કોરોનાની રસી લેવાનું રજિસ્ટ્રેશન શરૂ થયું છે પરંતુ આ રસીકરણ શરુ થવા અંગે શંકાઓ ઉભી થઇ છે. સુત્રો અનુસાર રાજ્ય સરકાર પાસે રસીનો પુરતો જથ્થો આવ્યો નથી.

 


સીએમ રૂપાણીએ તાજેતરમાં જ દાવો કર્યો હતો કે, રાજ્ય સરકાર દ્વારા 1.50 કરોડ ડોઝનો ઓર્ડર આપવામાં આવ્યો છે. જો કે, અધિકારીઓનું કહેવું છે કે, સરકારને હજી સુધી રસીનો જથ્થો મળવાનો બાકી છે.

 


સૂત્રએ જણાવ્યું, ‘‘રસી માટે સૌથી પહેલા ઓર્ડર આપ્નારા રાજ્યોમાં આપણો પણ સમાવેશ થાય છે, તેમ છતાં હજી સુધી આપણને ઉત્પાદકો અને કેંદ્ર સરકાર તરફથી પુરવઠો મળ્યો નથી. અમને ડર છે કે, શરૂઆતના અમુક દિવસો સુધી મોટાપાયે લોકોને રસી નહીં આપી શકાય. દરમિયાન, સરકારે રસીકરણના કેંદ્રો વધારવાનું નક્કી કર્યું છે જેથી વધેલી માગને પહોંચી શકાય.

 


વિશ્વસનીય સૂત્રોએ કહ્યું, હાલની તારીખમાં રાજ્ય સરકાર પાસે કોરોનાની રસીના 7.9 લાખ ડોઝ છે. જે કેંદ્ર તરફથી 45થી વધુ વયના લોકોના રસીકરણ માટે પ્રાપ્ત થયા હતા. હજી આ વયજૂથ માટેનો જ નવો સ્ટોક આવ્યો નથી. ગુજરાત સરકારના અંદાજ મુજબ 18થી45ના વયજૂથ માટે 6.50 કરોડ ડોઝ (જે લોકો લાયકાત ધરાવતા હોય તેમના માટે)ની જરૂર પડશે. 45 વર્ષથી ઉપરના લોકો માટે પ્રતિ દિવસ પાંચ લાખ ડોઝ આપવાનો ટાર્ગેટ કેંદ્ર સરકારે નક્કી કર્યો છે. જો કે, ગુજરાત સરકાર હજી સુધી એક પણ દિવસે આ લક્ષ્ય સાધી શકી નથી. અત્યાર સુધીમાં એક દિવસમાં સૌથી વધુ 4.90 લાખ લોકોને રસી આપવામાં આવી છે. વેક્સીનના ડોઝની અછત તેમજ કોરોનાને કાબૂમાં લેવાની ડ્યૂટીમાં મેડિકલ સ્ટાફ વ્યસ્ત હોવાથી છેલ્લા એક મહિનામાં દૈનિક 50,000થી 1 લાખની વચ્ચે જ ડોઝ આપી શકાયા છે.

 


ગુજરાતમાંથી હજારો લોકો કાગડોળે 28 એપ્રિલની રાહ જોઈ રહ્યા હતા, જેથી તેઓ કોવિડ વેક્સીન માટે પોતાનું રજિસ્ટ્રેશન કરી શકે. જો કે, વારંવાર પ્રયત્ન છતાં કેટલાય લોકોને નિરાશા સાંપડી કારણકે તેઓ રજિસ્ટ્રેશન ના કરાવી શક્યા. રાજ્યના આરોગ્ય વિભાગના સિનિયર અધિકારીઓએ પહેલા દિવસના રજિસ્ટ્રેશનના આંકડા બહાર પાડ્યા નથી પરંતુ ખૂબ ઓછા લોકો પોતાનું નામ રજિસ્ટર કરાવી શક્યા છે. ‘‘વેક્સીન ડિલિવરીનું શિડ્યુલ મળી જશે પછી રજિસ્ટ્રેશન શરૂ થશે. આ માટેની નવી તારીખ જાહેર કરવામાં આવશે. અમને આશા છે કે અમે શિડ્યુલ પ્રમાણે, જલદી જ રસીકરણ કરી શકીશું‘‘, તેમ સિનિયર અધિકારીએ જણાવ્યું. 


લાઈક અને ફોલો કરો અમારું ફેસબુક પેજ FACEBOOK - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


કોરોના અંગેના મહત્વના સમાચારો આપના મોબાઇલના વોટ્સ એપમાં મેળવવા માટે જોડાઓ અમારા વોટ્સ એપ ગ્રૂપમાં.  99251 12230  

View News On Application
RELATED NEWS