સર્વે: વિકસિત દેશો કરતાં ગ્લોબલ સાઉથના દેશોમાં વધુ સકારાત્મક વલણો : ભારતીય લોકો મોંઘવારી અને બેરોજગારીથી સૌથી વધુ ચિંતિત

વધુ એક સર્વેએ પુષ્ટિ કરી છે કે ભારતના લોકો ભવિષ્યને લઈને સૌથી વધુ આશાવાદી છે. વધુ મહત્ત્વની વાત એ છે કે ભારતમાં આ આશાવાદ વિશ્વમાં સૌથી ઝડપથી વિકસ્યો છે. ઈપ્સોસ દ્વારા ફેબ્રુઆરી 2024માં કરવામાં આવેલા સર્વેમાં જણાવાયું છે કે ભારતમાં 78 % લોકો માને છે કે દેશ સાચી દિશામાં જઈ રહ્યો છે.

પરિસ્થિતિમાં સુધારા પ્રત્યે આશાવાદી વલણ વિકસિત-પશ્ચિમી દેશો કરતાં વૈશ્વિક દક્ષિણના દેશોમાં વધુ છે. સર્વેમાં સામેલ 29 દેશોમાં ભારત સહિત માત્ર 8 દેશો એવા છે જ્યાં સ્થિતિ વધુ ખરાબ થઈ રહી છે. આ 8 દેશોમાં, પોલેન્ડ સિવાય, બધા ગ્લોબલ સાઉથના છે - ઇન્ડોનેશિયા, સિંગાપોર, થાઇલેન્ડ, આર્જેન્ટિના, મલેશિયા, પોલેન્ડ, મેક્સિકો, બ્રાઝિલ. જે દેશો ભવિષ્યને લઈને સૌથી વધુ નિરાશાવાદી છે તેઓ આ સર્વેમાં સૌથી નીચે છે. આમાં પેરુ 16%, દક્ષિણ આફ્રિકા 18%, ફ્રાન્સ 23%, હંગેરી 23% અને જર્મની જેવા દેશોનો સમાવેશ થાય છે, જ્યાં 25 % લોકો પણ આશાવાદી વલણ ધરાવતા નથી.

સર્વે અનુસાર ભારતીય લોકો મોંઘવારી અને બેરોજગારીથી સૌથી વધુ ચિંતિત છે. સર્વે મુજબ 49 % લોકોએ મોંઘવારી, 43 % લોકોએ બેરોજગારી, 35 % લોકોએ શિક્ષણ, 23 %  લોકોએ અપરાધ અને હિંસા અને 21 %  લોકોએ નાણાકીય અને રાજકીય ભ્રષ્ટાચારને સૌથી મોટો પડકાર ગણાવ્યો હતો. વિશ્વમાં 26% લોકો બેરોજગારીને મોટી સમસ્યા માને છે. વૈશ્વિક સ્તરે, ટોચની ચિંતાઓમાં 36% ફુગાવો, ગરીબી અને સામાજિક અસમાનતા 30%, ગુના અને હિંસા 30%, બેરોજગારી 26% અને ભ્રષ્ટાચાર 36%નો સમાવેશ થાય છે.

આ સર્વે ભારતમાં 16-74 વર્ષની વયના 25,292 લોકો વચ્ચે 26 જાન્યુઆરી 2024 થી 9 ફેબ્રુઆરી 2024 દરમિયાન હાથ ધરવામાં આવ્યો હતો. ભારતના સર્વેમાં પ્રમાણમાં વધુ શહેરી અને શિક્ષિત લોકોનો સમાવેશ કરવામાં આવ્યો હતો. સર્વેમાં કહેવામાં આવ્યું છે કે એવા સમયે જ્યારે વિશ્વ યુક્રેન અને ગાઝાના બે યુદ્ધમાંથી પસાર થઈ રહ્યું છે અને તેણે ભારત સહિત વૈશ્વિક અર્થવ્યવસ્થાને અસર કરી છે, જેના કારણે ફુગાવો વધી રહ્યો છે અને મોટા પાયે નોકરીઓમાં કાપ મુકાયો છે. આવા સમયમાં પણ ભારતે વિકાસ સાથે સ્થિરતા અને સાતત્ય દર્શાવ્યું છે. એક દેશ તરીકે ભારતના લોકો આગળ વધવાની તેમની પ્રાથમિકતાઓ નક્કી કરી રહ્યા છે. વોટ વરીઝ ધ વર્લ્ડ સર્વે અનુસાર, ઓછામાં ઓછા 78% શહેરી ભારતીયો માને છે કે ભારત સાચી દિશામાં આગળ વધી રહ્યું છે.