મંજૂરી વિના, મંજૂરી હોય તો મુદત પૂર્ણ થઇ ગઇ હોય તેવા તેમજ નિયમ વિરુધ્ધ, નડતરરૂપ રીતે મુકેલા બોર્ડ-બેનર જપ્ત: દબાણ હટાવ સ્ટાફ દોડ્યો, ડેઇલી ડ્રાઇવ શરૂ

રાજકોટ મહાનગરપાલિકાની દબાણ હટાવ શાખા દ્વારા એસ્ટ્રોન ચોક, ટાગોર માર્ગ, કુવાડવા રોડ, કોઠારીયા રોડ સહિતના વિસ્તારોમાંથી સાઇન બોર્ડ અને બેનર જપ્ત કરવા ડ્રાઇવ કરવામાં આવી હતી જેમાં મંજૂરી વિના મુકાયેલા, મંજૂરી હોય તો તેની મુદત પૂર્ણ થયા બાદ દૂર કરાયા ન હોય તેવા તેમજ નિયમ વિરુધ્ધ અને નડતરરૂપ કે દબાણરૂપ રીતે મુકાયેલા હોય તેવા કુલ ૧૧૬ સાઇન બોર્ડ અને બેનર જપ્ત કરી કુલ રૂ.૧,૮૬,૬૦૦ના દંડની વસુલાત કરાઇ હતી.

વિશેષમાં રાજકોટ મહાનગરપાલિકાની દબાણ હટાવ શાખાના સૂત્રોએ જણાવ્યું હતું કે જાહેર માર્ગો ઉપર દબાણરૂપ એવા રેકડી-કેબીન, અન્ય ચીજવસ્તુઓ, શાકભાજી-ફળો જપ્તી તેમજ પશુઓને આપવામાં આવતું લીલું, બોર્ડ-બેનરો વગેરે જપ્ત કરવાની કામગીરી કરવામાં આવી હતી જેમાં રસ્તા પર નડતરરૂપ ૧૪ રેકડી કોઠારીયા મેઈન રોડ,રોયલ પાર્ક, રૈયા રોડ, નંદનવન રોડ પરથી જપ્ત કરવામાં આવી હતી. જુદીજુદી અન્ય ૬૦ પરચુરણ ચીજ વસ્તુઓ જપ્ત કરવામાં આવી હતી જે કોઠારીયા મેઈન રોડ, છોટુનગર, ગોકુલધામ મેઈન રોડ પરથી જપ્ત કરવામાં આવી હતી. ૯૦ કિલો શાકભાજી-ફળો કે જે ઉપયોગમાં લઇ શકાય તેમ ન હતા તે પારેવડી ચોક, જંકશન રોડ પરથી જપ્ત કરવામાં આવ્યા હતા, તેમજ રૂ.૩૦,૦૦૦નો વહીવટી ચાર્જ કોઠારીયા મેઈન રોડ, એરપોર્ટ રોડ, એસ્ટ્રોન ચોક પાસેથી વસુલ કરવામાં આવ્યો હતો, તેમજ રૂ.૧,૫૬,૬૦૦નો મંડપ ચાર્જ તે સંતકબીર રોડ, કેનાલ રોડ, અયોધ્યા ચોક, મવડી મેઈન રોડ, ચંદ્રેશનગર મેઈન રોડ,૧૫૦ ફુટ રિંગ રોડ,શિતલ પાર્ક પાસેથી વસુલ કરવામાં આવ્યો હતો.