કોંગ્રેસ અધ્યક્ષ મલ્લિકાર્જુન ખડગેના નિવેદન ‘ઝેરી સાપ’ પર ભાજપ આકરા પ્રહાર કરી રહી છે. તેમણે વડાપ્રધાન નરેન્દ્ર મોદીને લઈને એક નિવેદન આપ્યું હતું જેમાં તેમણે કહ્યું હતું કે પીએમ મોદી ઝેર સમાન છે. આસામના મુખ્યમંત્રી હિમંતા બિસ્વા સરમાએ પણ આ ટિપ્પણી પર પ્રતિક્રિયા આપી છે.

તેમણે સોશિયલ મીડિયા પ્લેટફોર્મ ટ્વિટર પર કહ્યું, “કોંગ્રેસના કાળા કારનામામાં સામેલ લોકોને ભગવાન શંકરના નાગરાજથી ડરવું જોઈએ. આવા લોકો મોદીજીને જેટલા અપશબ્દો બોલશે, તેટલા જ તેમને જનતા-જનાર્દન તરફથી આશીર્વાદ મળશે. આ પહેલા ભાજપના અન્ય નેતાઓએ પણ પ્રતિક્રિયા આપી હતી. ગૃહ રાજ્યમંત્રી નિત્યાનંદ રાયે પણ ખડગેની ટિપ્પણી સામે વાંધો ઉઠાવ્યો હતો અને કહ્યું હતું કે કોંગ્રેસે ઝેર જ વાવ્યું છે.

નિત્યાનંદ રાયે ટ્વીટ કર્યું કે, "કોંગ્રેસના નેતા મલ્લિકાર્જુન ખડગેએ વડાપ્રધાન માટે 'ઝેરી સાપ' જેવી વાંધાજનક ભાષાનો ઉપયોગ કર્યો છે. ખડગે, કોંગ્રેસે ઝેર વાવ્યું. સમાજમાં વિભાજનનું ઝેર, દેશના વિભાજનનું ઝેર, ભ્રષ્ટાચારનું ઝેર, રાજકારણમાં વંશવાદનું ઝેર – આ બધું કોંગ્રેસે વાવેલું ઝેર છે.

જો કે, મલ્લિકાર્જુન ખડગેએ તેમની ટિપ્પણી અંગે સ્પષ્ટતા કરતા કહ્યું, "આ નિવેદન પીએમ મોદી માટે નથી, મારો મતલબ હતો કે ભાજપની વિચારધારા 'સાપ જેવી' છે. મેં પીએમ મોદી માટે અંગત રીતે આવું ક્યારેય નથી કહ્યું, મેં કહ્યું કે તેમની વિચારધારા સાપ જેવી છે અને જો તમે તેને સ્પર્શ કરવાનો પ્રયાસ કરશો તો તમારું મૃત્યુ નિશ્ચિત છે.”