કોરોના કોઈને પુછીને આવતો નથી, મને પણ હતું કે કંઈ ન થાય પરંતુ પછી સત્ય સમજાયું, લોકોને અપીલ છે કે ધ્યાન રાખો : પૂર્વ કેન્દ્રીય મંત્રી ભરતસિંહ સોલંકી

  • October 28, 2020 02:04 AM 4161 views

કોંગ્રેસ નેતા અને પૂર્વ કેન્દ્રીય મંત્રી ભરતસિંહ સોલંકીએ 100 દિવસથી વધુ દિવસની સારવાર બાદ કોરોનાને મ્હાત કર્યો છે. તેમની સારવાર સિમ્સ હોસ્પિટલ ખાતે ચાલી રહી હતી. આજે તેમને હોસ્પિટલમાંથી ડિસ્ચાર્જ કરવામાં આવ્યા હતા.  આ તકે તેમણે ડોક્ટર્સ અને હોસ્પિટલના સ્ટાફનો આભાર માન્યો હતો. સાથે જ  તેમણે લોકોને કહ્યું હતું કે કોરોનાથી બચવા તકેદારી રાખે અને માસ્ક તેમજ સામાજિક અંતરના નિયમનું પાલન કરે. તેમને આ નવું જીવન મળ્યું છે. 


ભરતસિંહે લોકોને અપીલ કરતા કહ્યું હતું કે કોરોના કોઈને પુછીને આવતો નથી, તેમને પણ એમ હતું કે તેમની રોગપ્રતિકારક શક્તિ ખૂબ સારી છે તેથી તેમને ડરવાની જરૂર નથી. પરંતુ તકેદારી રાખ્યા બાદ પણ તમને કોરોના થયો અને સૌથી લાંબી સારવાર તેમણે લેવી પડી.    

અત્રે ઉલ્લેખનીય છે કે રાજ્યસભાની ચૂંટણી બાદ ભરતસિંહનો કોરોના રિપોર્ટ પોઝિટિવ આવ્યો હતો. ત્યારબાદ તેઓને વડોદરા ખાતે સારવાર આપવામાં આવી હતી. જો કે સારવાર દરમિયાન પણ તેમની તબિયતમાં સુધારો ન થતાં તેઓને સારવાર માટે અમદાવાદ ખસેડવામાં આવ્યા હતા. 

ભરતસિંહ સોલંકીને સ્થિતિ કોમોરબીડ હતી તેમને હાઈ બ્લડપ્રેશર, કીડની અને દમની સમસ્યાઓ સાથે કોરોનાનું સંક્રમણ થતાં અનેક વાર તેમની તબિયત નાજુક થઈ હતી. 100 દિવસથી વધુની સારવાર દરમિયાન તેઓ સતત 51 દિવસ સુધી વેન્ટીલેટર પર હતા. ગત સાત જુલાઈથી તેઓ અમદાવાદની સીમ્સ ખાતે સારવારમાં હતા. આજે જ્યારે તેઓ ડિસ્ચાર્જ થયા ત્યારે મીડિયા સાથે વાત કરતાં તેમણે કહ્યું હતું કે, તેમને નવું જીવન મળ્યું છે જેના માટે તેઓ હોસ્પિટલની ટીમનો આભાર માને છે. આ સાથે જ તેમણે લાખો કાર્યકરોનો પણ આભાર માન્યો હતો જેમણે તેમના સ્વાસ્થ્ય માટે પ્રાર્થના કરી હતી. 
 
હોસ્પિટલમાં અનુભવ કેવો રહ્યો તે વિશે જણાવતા તેમણે ઉમેર્યું હતું કે, સ્વસ્થ થવું તે મારા માટે આ એક ચમત્કાર જ છે. હોસ્પિટલમાં જીવીશ કે મરીશ એવા વિચારો સતત આવતા હતા. મારા માટે આ સમય જેલ કરતા પણ વધારે અઘરો સમય હતો. ભરતસિંહે વધુમાં જણાવ્યુ હતું કે, "આખી દુનિયા આ રોગના ભરડામાં છે. આ રોગ ભયંકર હોવા છતાં જે લોકો હિંમત નથી હારતા અને ડોક્ટર્સની સૂચના પ્રમાણે કરે છે તેઓ સ્વસ્થ થાય જ છે. હું જ્યારે લોકો વચ્ચે ફરતો હતો ત્યારે એવું લાગતું હતું કે આવું કંઈક થશે નહીં. મારા પહેલાના અને અત્યારના ફોટોમાં જે તફાવત છે ચે જોઈ જાણી શકાય છે કે આ સ્થિતિ કેવી કપરી રહી હશે.   


હોસ્પિટલમાં રાત-દિવસ દીવાલ અને લાઇટો જોઈ અને ભગવાનના ભરોસે સમય કાઢ્યો છે. હું અતિ આત્મવિશ્વાસમાં હતો. મને હતું કે મને કંઈ નહીં થાય. કારણ કે મને તાવ સિવાય કંઈ ન હતું. હું લોકોને અપીલ કરું છું કે કોરોનાથી બચવા માટે માસ્ક જરૂરથી પહેરે. સોશિયલ ડિસ્ટન્સિંગ પણ એટલું જ જરૂરી છે." તેમ પણ તેમણે જણાવ્યું હતું. 


લાઈક અને ફોલો કરો અમારું ફેસબુક પેજ FACEBOOK - AAJKAALDAILY


સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY


કોરોના અંગેના મહત્વના સમાચારો આપના મોબાઇલના વોટ્સ એપમાં મેળવવા માટે જોડાઓ અમારા વોટ્સ એપ ગ્રૂપમાં.  9978984740  

View News On Application