માવઠુ અને પહાડી પ્રદેશોમાં હિમવર્ષાની અસર વર્તાઈ : પહેલીવાર માર્ચમાં -૩ ડીગ્રી સુધી તાપમાન નીચું જતા સહેલાણીઓ ઉમટ્યા

હાલમાં ગુજરાતના કેટલાક વિસ્તારોમાં માવઠુ અને પહાડી પ્રદેશોમાં થયેલી હિમ વર્ષાની અસર રાજ્યને અડીને આવેલા હિલ સ્ટેશન માઉન્ટ આબુમાં વર્તાઈ છે. માર્ચ મહિનામાં સામાન્ય રીતે ગરમ થતા હિલ સ્ટેશન ઉપર પ્રથમવાર તાપમાન માઈનસ નોંધાતાં સહેલાણીઓ નજારો માણવા ઉમટી રહ્યા છે.

ઉત્તર ગુજરાતમાં શનિવારે પલટાયેલા વાતાવરણ બાદ કેટલાક વિસ્તારોમાં માવઠાની અસર જોવા મળી રહી છે. જેથી છેલ્લા ચાર દિવસથી ઠંડીને ચમકારો વર્તાઈ રહ્યો છે. સાથે સાથે પહાડી પ્રદેશોમાં હિમ વર્ષા થતાં ઉત્તર ગુજરાત સાથે રાજસ્થાનના સરહદી વિસ્તારોમાં પણ ઠંડી અનુભવાઈ રહી છે. થોડાક દિવસો ગરમી અનુભવાયા બાદ ફરી વાતાવરણ ઠંડુગાર બની જતાં લોકોને ફરી ગરમ કપડા પહેરવાની ફરજ પડી રહી છે. જો કે, કમોસમી વરસાદની અસર રાજસ્થાનના એક માત્ર હિલ સ્ટેશન માઉન્ટ આબુમાં જોવા મળી રહી છે.

આબુમાં તાપમાનનો પારો એકવાર ફરી માઇનસમાં ગયો હતો. છેલ્લા પંદર દિવસથી માઉન્ટ આબુનું તાપમાન પંદર ડિગ્રી રહ્યું હતું પરંતુ મોસમના મિજાજ બદલાતા અચાનક તાપમાનનો પારો ગગડ્યો હતો અને ઉચ્ચતમ ૧૫ ડિગ્રીથી -૩ ડિગ્રીએ પારો પહોંચ્યો હતો. આવા આહલાદક વાતાવરણમાં સહેલાણીઓ કુદરતી દેન એવા હિલ સ્ટેશનનો નજારો જોઈ મંત્રમુગ્ધ થયા હતા.