દુનિયાભરમાં ફેન્સ હંમેશા ટોમ ક્રૂઝની ફિલ્મની રાહ જોતા હોય છે. તેની આગામી ફિલ્મ મિશન ઈમ્પોસિબલ 7નું ટ્રેલર રિલીઝ કરવામાં આવ્યું છે. જ્યારે ભારતીય ચાહકોએ આ ફિલ્મનું ટ્રેલર જોયું, ત્યારે તેમને જાન્યુઆરી 2023માં રિલીઝ થયેલી શાહરૂખ ખાનની ફિલ્મ પઠાણની યાદ આવી ગઈ. આ પછી હોલીવુડની ફિલ્મ મિશન ઈમ્પોસિબલ ટ્રોલ થવા લાગી છે.

ફિલ્મના ટ્રેલરમાં દેખાડવામાં આવેલા કેટલાક દ્રશ્યો એવા છે જે શાહરૂખ ખાનની ફિલ્મ પઠાણની યાદ અપાવે છે. ચાહકોએ આવા કેટલાક દ્રશ્યો શેર કરવાનું શરૂ કર્યું અને સરખામણી કરતા કહ્યું કે મિશન ઈમ્પોસિબલના સીન એવા છે જે શાહરૂખના પઠાણ પાસેથી ચોરાઈ ગયા છે. ફિલ્મના ટ્રેઇલરમાં દેખાતું એક ટ્રેનનું દ્રશ્ય ચાહકોને બરાબર પઠાણના એક સીન જેવું જ લાગી રહ્યું છે ફરક એટલો છે કે પઠાણમાં શાહરૂખ અને સલમાન ચાલતી ટ્રેનમાં લટકતા જોવા મળે છે, જ્યારે મિશન ઈમ્પોસિબલમાં ટોમ ક્રૂઝ લટકતા જોવા મળે છે.

જ્યારે સાઉથની ફિલ્મોની વધતી જતી તાકાત વચ્ચે બોલિવૂડનું ભવિષ્ય જોખમમાં હતું, ત્યારે શાહરૂખ ખાનની પઠાણ ઈન્ડસ્ટ્રીને બચાવી હતી. આ ફિલ્મે વિશ્વભરમાં 1000 કરોડથી વધુની કમાણી કરી હતી. આ સાથે જ આ ફિલ્મ હિન્દી ભાષામાં પણ સૌથી વધુ કમાણી કરનારી ફિલ્મ બની ગઈ છે. આ ફિલ્મમાં શાહરૂખ ખાન સાથે સલમાન ખાનની જોડીને ખૂબ પસંદ કરવામાં આવી હતી.