દિલ્હીની જેમ જ પાકિસ્તાનની રાજધાની ઇસ્લામાબાદમાં જિલ્લા કોર્ટ પાસે આજે બપોરે એક મોટો બ્લાસ્ટ થયો હતો, જેમાં ઓછામાં ઓછા નવ લોકો માર્યા ગયા હતા અને ૨૧ લોકો ઘાયલ થયા હતા. પ્રારંભિક માહિતી અનુસાર, કોર્ટ સંકુલના પાર્કિંગમાં પાર્ક કરેલી કારમાં ગેસ સિલિન્ડર ફાટવાથી આ વિસ્ફોટ થયો હોવાનું પ્રાથમિક અનુમાન લગાવવામાં આવી રહ્યું છે.

વિસ્ફોટ એટલો શક્તિશાળી હતો કે તેનો અવાજ પોલીસ લાઇન્સ હેડક્વાર્ટર સુધી સંભળાયો હતો, જેના કારણે આસપાસના વિસ્તારમાં ગભરાટ ફેલાયો હતો. બચાવ અને રાહત ટીમો તાત્કાલિક ઘટનાસ્થળે પહોંચી ગઈ હતી, અને સુરક્ષા દળોએ વિસ્તારને ઘેરી લીધો હતો. પ્રાથમિક તપાસ માટે બોમ્બ ડિસ્પોઝલ સ્ક્વોડ અને ફોરેન્સિક નિષ્ણાતોને પણ બોલાવવામાં આવ્યા છે.

પોલીસ અધિકારીઓના જણાવ્યા અનુસાર, કોર્ટ સંકુલના પાર્કિંગમાં પાર્ક કરેલા વાહનો પાસે વિસ્ફોટ થયો હતો. જેના કારણે વિસ્ફોટથી અનેક વાહનોને નુકસાન થયું હતું અને ત્યાં હાજર લોકોમાં નાસભાગ મચી ગઈ હતી. તમામ ઘાયલોને તાત્કાલિક પાકિસ્તાન ઇન્સ્ટિટ્યૂટ ઓફ મેડિકલ સાયન્સ હોસ્પિટલમાં દાખલ કરવામાં આવ્યા હતા, જ્યાં તેમની સારવાર ચાલી રહી છે.

વિસ્ફોટ બાદ, કોર્ટ અને આસપાસના વિસ્તારોમાં સુરક્ષા વધારી દેવામાં આવી છે. પોલીસે તમામ પ્રવેશદ્વારો પર સર્ચ ઓપરેશન શરૂ કર્યું છે. કોર્ટની તમામ કાર્યવાહી અસ્થાયી રૂપે બંધ કરી દેવામાં આવી છે, અને લોકોને વિસ્તારથી દૂર રહેવાની વિનંતી કરવામાં આવી છે.

પાકિસ્તાની મીડિયા અહેવાલો અનુસાર, કોર્ટ વિસ્તારમાં ભારે ટ્રાફિક અને ભીડ હતી ત્યારે વિસ્ફોટ થયો હતો. પોલીસને શંકા છે કે વિસ્ફોટ કોઈ મોટા ષડયંત્રનો ભાગ હોઈ શકે છે, જોકે આની સત્તાવાર પુષ્ટિ કરવામાં આવી નથી.

વિસ્ફોટનું કારણ હજુ અસ્પષ્ટ 

અધિકારીઓનું કહેવું છે કે હાલમાં તે સ્પષ્ટ નથી કે વિસ્ફોટ પ્લાન્ટ કરેલા ઉપકરણ, સિલિન્ડર બ્લાસ્ટ અથવા તકનીકી ખામીને કારણે થયો હતો. બોમ્બ ડિસ્પોઝલ નિષ્ણાતો વિસ્ફોટના પ્રકારને નક્કી કરવા માટે કાટમાળની નજીકથી તપાસ કરી રહ્યા છે.