શહેરના કુવાડવા રોડ પર ડી માર્ટ પાસે ગ્રીન એવન્યુમાં રહેતા શ્યામ રાજાણી નામના યુવકે એવો ગંભીર આક્ષેપ કર્યો હતો કે, તેની પૂર્વ પત્નીએ કરેલી અરજીની તપાસના કામે તેને પોલીસ કમિશનર કચેરીએ બોલાવવામાં આવ્યો હતો. બાદમાં પોલીસ કમિશનરની ચેમ્બરમાં પોલીસ કમિશનરની હાજરીમાં તેને ખુરશી પકડાવી યુવતીની નજર સામે ક્રાઈમ બ્રાન્ચ પીઆઈએ ઢોર મારમાર્યો હતો.

ગ્રીન એવન્યુમાં રહેતા શ્યામ રાજાણી નામના યુવાને કરેલા ગંભીર આક્ષેપોમાં જણાવ્યું હતું કે,મારી પૂર્વ પત્નીએ મારી સામે અને મેં તેની સામે અરજી કરી હોય જેને લઇ ગઇકાલે હું મહિલા પોલીસ સ્ટેશને ગયો હતો ત્યારે અરજીના કામે મને કમિશનર કચેરીએ બોલાવ્યો હતો.જેથી હું કમિશનર કચેરીએ ગયો હતો. યુવાને વધુમાં જણાવ્યું હતું કે, કમિશનર કચેરી ગયા બાદ અહીં પોલીસ કમિશનરની ચેમ્બરમાં મને બોલાવવામાં આવ્યો હતો. જ્યાં પોલીસ કમિશનર ચેમ્બરમાં મારી પૂર્વ પત્ની પણ બેઠી હતી. દરમિયાન અહીં મને ખુરશી પકડાવી હતી બાદમાં ક્રાઈમ બ્રાન્ચના પીઆઇ ગોંડલીયા સાહેબે બેરહેમીપૂર્વક માર માર્યો હતો. માત્ર અરજીના કામે બોલાવ્યા બાદ મારી કોઈપણ વાત સાંભળ્યા વિના મને માર મારવામાં આવ્યો હતો. અગાઉ મેં પગમાં ઓપરેશન કરાવ્યું હોય તે બાબતે કહેવા છતાં મને મારમાર્યે રાખ્યો હતો.
શ્યામ રાજાણીએ અંતમાં જણાવ્યું હતું કે,અરજીના કામે મને બોલાવી મારી કોઇપણ પ્રકારની વાત સાંભળ્યા વગર મને બેરહેમીપૂર્વક માર મારવા પાછળનું કારણ શું? આ બાબતે ન્યાય મળે તેવું યુવાને અંતમાં જણાવ્યું હતું.