યુએસ રાષ્ટ્રપતિ ડોનાલ્ડ ટ્રમ્પે ફરી એકવાર દાવો કર્યો હતો કે તેમણે ભારત અને પાકિસ્તાનને લડતા અટકાવ્યા હતા અને બંને દેશોને કહ્યું હતું કે તેમનું વહીવટીતંત્ર એકબીજા પર ગોળીબાર કરનારાઓ સાથે વેપાર કરી શકતું નથી.

અબજોપતિ ઉદ્યોગપતિ અને ટેસ્લાના સીઈઓ ઈલોન મસ્ક સાથે ઓવલ ઓફિસમાં એક પ્રેસ કોન્ફરન્સ દરમિયાન, ટ્રમ્પે કહ્યું હતું કે, "અમે ભારત અને પાકિસ્તાનને લડતા અટકાવ્યા હતા. મારું માનવું છે કે આ પરમાણુ યુદ્ધમાં ફેરવાઈ શક્યું હોત. ટ્રમ્પે કહ્યું કે તેઓ ભારત, પાકિસ્તાન અને તેમના લોકોનો પણ આભાર માનવા માંગે છે. તેમણે કહ્યું કે અમે વેપાર વિશે વાત કરી હતી અને કહ્યું હતું કે અમે એવા લોકો સાથે વેપાર કરી શકતા નથી જેઓ એકબીજા પર ગોળીબાર કરી રહ્યા છે અને જેઓ પરમાણુ શસ્ત્રોનો ઉપયોગ કરે તેવી શક્યતા છે.

અમેરિકી રાષ્ટ્રપતિએ કહ્યું કે ભારત અને પાકિસ્તાનના નેતાઓ 'મહાન' છે અને 'તેઓએ શાણપણ બતાવ્યું અને સંમત થયા, જેના પછી આ બધું બંધ થઈ ગયું.' આ પહેલી વાર નથી જ્યારે ટ્રમ્પે ભારત અને પાકિસ્તાન વચ્ચે યુદ્ધવિરામ લાવવાનો દાવો કર્યો હોય. તેમણે આ દાવો પહેલા પણ ઘણી વખત કર્યો છે. જોકે, ભારત દ્વારા અમેરિકન રાષ્ટ્રપતિના દાવાને નકારી કાઢવામાં આવ્યો હતો.

યુદ્ધવિરામ બંને દેશોની પરસ્પર સંમતિથી થયો હતો:વિદેશ મંત્રાલય

ભારતીય વિદેશ મંત્રાલયે યુદ્ધવિરામ અંગે સ્પષ્ટતા કરી કે તે બંને દેશો વચ્ચે અને બંનેની પરસ્પર સંમતિથી થયો હતો. પાકિસ્તાનના ડીજીએમઓ તરફથી યુદ્ધવિરામ માટે કોલ આવ્યો હતો. બંને દેશોના ડીજીએમઓ વચ્ચેની વાતચીત પછી યુદ્ધવિરામ પર સંમતિ સધાઈ હતી.