મણિપુરમાં ફરી એકવાર હિંસાની ઘટનાઓ જોવા મળી રહી છે. ગઈકાલે જીરીબામ જિલ્લામાં હિંસામાં પાંચ લોકોના મોત થયા હતા. ઊંઘમાં એક વ્યક્તિની હત્યા કરવામાં આવી હતી. પોલીસે જણાવ્યું હતું કે કેટલાક બદમાશોએ ઇમ્ફાલ પૂર્વ જિલ્લામાં મણિપુર રાઇફલ્સની બે બટાલિયનના શસ્ત્રાગારમાંથી શસ્ત્રો લૂંટવાનો પ્રયાસ કર્યો હતો, પરંતુ સુરક્ષા દળોએ ટીયર ગેસના શેલ અને ખાલી રાઉન્ડ ફાયર કરીને ભીડને વિખેરી નાખી હતી.

પોલીસના હથિયારો ચોરવાનો પ્રયાસ

એક વરિષ્ઠ પોલીસ અધિકારીએ જણાવ્યું હતું કે શુક્રવારે મોડી સાંજે કેટલાક બદમાશોએ 7મી અને 2જી મણિપુર રાઈફલ્સ બટાલિયનમાંથી હથિયારો લૂંટવાનો પ્રયાસ કર્યો હતો પરંતુ સંયુક્ત સુરક્ષા દળોએ સફળતાપૂર્વક ટોળાને વિખેરી નાખ્યું હતું.

હિંસામાં બે પોલીસકર્મી ઘાયલ

બાદમાં જ્યારે સુરક્ષા ટીમ ખાબેસોઈમાં સ્થાપિત 7મી બટાલિયનમાંથી પરત ફરી રહી હતી, ત્યારે બદમાશોએ તેમના પર ગોળીબાર કર્યો હતો. જેમાં બે પોલીસકર્મીઓ ઘાયલ થયા.

વરિષ્ઠ અધિકારીઓ તાત્કાલિક ઘટનાસ્થળે પહોંચ્યા હતા અને પરિસ્થિતિને કાબૂમાં લીધી. પોલીસ ફરી એકવાર દરેક લોકોને કાયદો પોતાના હાથમાં ન લેવાની અપીલ કરી રહી છે. આવી ઉદ્ધતાઈમાં સંડોવાયેલા બદમાશો સામે સખત કાર્યવાહી કરવામાં આવશે અને ગંભીર કાયદાકીય પરિણામોનો સામનો કરવો પડશે.

સર્વેલન્સ માટે લશ્કરી હેલિકોપ્ટર તૈનાત

 હિંસાની ઘટનાઓને કારણે હવાઈ પેટ્રોલિંગ માટે લશ્કરી હેલિકોપ્ટર પણ તૈનાત કરવામાં આવ્યું છે અને આતંકવાદીઓના ડ્રોનને મારવા માટે એન્ટી ડ્રોન સિસ્ટમ તૈનાત કરવામાં આવી છે.

લૂંટાયેલા હથિયારો અને દારૂગોળો મળી આવ્યો

ગયા વર્ષે મે મહિનામાં મણિપુરમાં જાતિય હિંસા ફાટી નીકળ્યા બાદ હિંસક ટોળાએ મણિપુર પોલીસના શસ્ત્રાગાર અને જિલ્લાઓમાં અન્ય સુરક્ષા ચોકીઓમાંથી 4000 થી વધુ અત્યાધુનિક હથિયારો અને લાખો દારૂગોળો લૂંટી લીધો હતો. સુરક્ષા દળોએ બાદમાં મોટી સંખ્યામાં લૂંટાયેલા હથિયારો અને દારૂગોળો જપ્ત કર્યો હતો.