ચાઈલ્ડ પોર્નોગ્રાફી મામલે સુપ્રીમ કોર્ટે મોટો નિર્ણય સંભળાવ્યો છે. સુપ્રીમ કોર્ટે કહ્યું કે, ચાઈલ્ડ પોર્નોગ્રાફી જોવી અને ડાઉનલોડ કરવી એ ગુનો છે. સુપ્રીમ કોર્ટે આ કેસમાં મદ્રાસ હાઈકોર્ટના નિર્ણયને પલટીને આ નિર્ણય આપ્યો છે. સુપ્રીમ કોર્ટે કહ્યું છે કે, કાયદેસર રીતે આવી સામગ્રી રાખવી એ પણ ગુનો છે. CJI ડી.વાય ચંદ્રચુડ, જસ્ટિસ જે.બી. પારડીવાલા અને જસ્ટિસ મનોજ મિશ્રાની બેન્ચે આ નિર્ણય આપ્યો છે. અરજીમાં મદ્રાસ હાઈકોર્ટના નિર્ણયને પડકારવામાં આવ્યો હતો, જેમાં કહેવામાં આવ્યું હતું કે, માત્ર ચાઈલ્ડ પોર્નોગ્રાફી ડાઉનલોડ કરવી અને જોવી એ POCSO એક્ટ અને ઈન્ફોર્મેશન ટેક્નોલોજી એક્ટ હેઠળ ગુનો નથી. આ સાથે સુપ્રીમ કોર્ટે કેન્દ્ર સરકારને POCSO એક્ટમાં ફેરફાર કરવા અને ચાઈલ્ડ પોર્નોગ્રાફી શબ્દને ચાઈલ્ડ સેક્સ્યુઅલી એબ્યુઝિવ એન્ડ એક્સપ્લોઈટિવ મટિરિયલ (CSAEM) સાથે બદલવાની સલાહ આપી છે.

સુનાવણી દરમિયાન જસ્ટિસ જે.બી.પારડીવાલાએ કહ્યું કે, અમે કેન્દ્રને એમ પણ અનુરોધ કર્યો છે કે, ચાઈલ્ડ પોર્નોગ્રાફીને બાળ યૌન શોષણ સામગ્રી સાથે બદલવા માટે વટહુકમ જાહેર કરવામાં આવે. આ સાથે હાઈકોર્ટને ચાઈલ્ડ પોર્નોગ્રાફી શબ્દનો ઉપયોગ ન કરવા પણ કહેવામાં આવ્યું છે. જણાવી દઈએ કે, NGO જસ્ટ રાઈટ ફોર ચિલ્ડ્રન એલાયન્સની અરજી પર સુનાવણી કર્યા બાદ સુપ્રીમ કોર્ટે આ નિર્ણય આપ્યો છે. આ NGOએ મદ્રાસ હાઈકોર્ટના નિર્ણય વિરુદ્ધ સુપ્રીમ કોર્ટમાં અરજી કરી હતી. મદ્રાસ હાઈકોર્ટે ચાઈલ્ડ પોર્નોગ્રાફી ડાઉનલોડ કરવા અને જોવાને ગુનો ગણ્યો નથી.