બુધવારે રશિયાના યુરાલ પર્વતમાળાના વિસ્તારમાં આવેલા પર્મ તેલ પ્લાન્ટમાં ભીષણ આગ ફાટી નીકળી હતી. યુક્રેનના રાષ્ટ્રપતિ વોલોદિમીર ઝેલેન્સ્કીએ દાવો કર્યો છે કે, આ તેમના દેશ દ્વારા કરવામાં આવેલ અત્યાર સુધીનો સૌથી લાંબી દૂરીનો ડ્રોન હુમલો છે. રશિયન મીડિયા અનુસાર, આ સંકુલ એક ‘પમ્પિંગ સ્ટેશન’ અને સ્ટોરેજ કોમ્પ્લેક્સ હતું, જે યુદ્ધ માટે ઇંધણ પૂરું પાડવામાં મહત્વની ભૂમિકા ભજવે છે.

યુક્રેનની વધતી સૈન્ય તાકાત અને ડ્રોન ટેકનોલોજી
પર્મ ક્ષેત્રના ગવર્નર દિમિત્રી માખોનિને પુષ્ટિ કરી છે કે, એક ડ્રોન હુમલાને કારણે સ્થાનિક ઔદ્યોગિક સંકુલમાં આગ લાગી હતી. આ ઘટના યુક્રેનના તે દાવાઓને સમર્થન આપે છે જેમાં કિવ કહી રહ્યું છે કે, તેણે હવે એવા ડ્રોન વિકસાવ્યા છે જે ૧,૫૦૦ કિમીથી વધુ અંતર કાપીને સચોટ નિશાન સાધી શકે છે. બંને દેશો વચ્ચેના યુદ્ધમાં હવે ડ્રોન ટેકનોલોજી નિર્ણાયક પરિબળ સાબિત થઈ રહી છે.

રાષ્ટ્રપતિ ઝેલેન્સ્કીનો વીડિયો સંદેશ
સોશિયલ મીડિયા પર એક વીડિયો સંદેશ જારી કરતા રાષ્ટ્રપતિ ઝેલેન્સ્કીએ આકાશમાં ઉઠતા કાળા ધુમાડાના ગોટા બતાવ્યા હતા. તેમણે સ્પષ્ટ કર્યું કે, યુક્રેન રશિયાની યુદ્ધ લડવાની ક્ષમતાને મર્યાદિત કરવા માટે તેના તેલ મહેસૂલ (Oil Revenue) પર પ્રહાર કરી રહ્યું છે. ઝેલેન્સ્કીએ જણાવ્યું હતું કે, "સીધી રેખામાં અંતર ૧,૫૦૦ કિલોમીટરથી વધુ છે. અમે આ મર્યાદાઓને હજુ પણ આગળ વધારતા રહીશું." તેમણે આ સફળતા માટે યુક્રેનની સુરક્ષા સેવાઓનો આભાર માન્યો હતો.

​​​​​​​સતત થઈ રહેલા હુમલા અને વળતો પ્રહાર
કાળા સમુદ્રમાં સ્થિત તુઆપસે (Tuapse) તેલ રિફાઇનરી પર બે અઠવાડિયામાં ત્રણ વખત હુમલો કર્યા બાદ યુક્રેનનો આ બીજો મોટો પ્રહાર છે. દરમિયાન રશિયન સંરક્ષણ મંત્રાલયે દાવો કર્યો છે કે, તેમની વાયુસેનાએ રાતોરાત ૯૮ યુક્રેનિયન ડ્રોન તોડી પાડ્યા છે. બીજી તરફ, યુક્રેને પણ દાવો કર્યો છે કે તેણે રશિયા દ્વારા છોડવામાં આવેલા ૧૭૧ ડ્રોનમાંથી ૧૫૪ ડ્રોનને હવામાં જ તોડી પાડ્યા છે.

નિષ્ણાતો માને છે કે જો યુક્રેન રશિયાના તેલ ભંડાર અને રિફાઇનરીઓને આ રીતે નિશાન બનાવતું રહેશે, તો રશિયા માટે યુદ્ધનો આર્થિક બોજ સહન કરવો મુશ્કેલ બની શકે છે. રશિયા હવે તેના આંતરિક વિસ્તારોની સુરક્ષા માટે એર ડિફેન્સ સિસ્ટમ્સને ફરીથી તૈનાત કરવા મજબૂર બન્યું છે.