દુનિયાના વિવિધ ભાગોમાં ચાલી રહેલા સંઘર્ષો અને ખાસ કરીને ઈરાન સાથે વધતા તણાવને કારણે અમેરિકાના સંરક્ષણ સંસાધનો પર ભારે દબાણ આવ્યું છે. ટ્રમ્પ પ્રશાસન હવે ઈચ્છે છે કે અમેરિકાની ઓટોમોબાઈલ કંપનીઓ અને અન્ય ઉત્પાદકો હથિયાર ઉત્પાદનમાં મોટી ભૂમિકા ભજવે. આ માટે પેન્ટાગોનના ઉચ્ચ અધિકારીઓએ જનરલ મોટર્સના મેરી બારા અને ફોર્ડ મોટર્સના જિમ ફાર્લે સહિતના ટોચના સીઈઓ સાથે શ્રેણીબદ્ધ બેઠકો શરૂ કરી છે.

શસ્ત્ર ભંડારમાં સર્જાઈ અછત
યુક્રેન અને ઈરાન યુદ્ધમાં સતત સપ્લાય પૂરો પાડવાને કારણે અમેરિકાનો પોતાનો શસ્ત્ર ભંડાર ઘટી રહ્યો છે. પરંપરાગત સંરક્ષણ કંપનીઓ (જેમ કે લોકહીડ માર્ટિન અથવા બોઈંગ) વધતી જતી માંગને પહોંચી વળવા સક્ષમ નથી. આથી પેન્ટાગોન હવે કાર કંપનીઓની ફેક્ટરી ક્ષમતા અને તેમના કર્મચારીઓનો ઉપયોગ શસ્ત્રો અને સૈન્ય સાધનોના ઉત્પાદન માટે કરવા માંગે છે.

સીધા કારથી હથિયારો સુધીની સફર
વોલ સ્ટ્રીટ જર્નલ (WSJ) ના અહેવાલ મુજબ સંરક્ષણ અધિકારીઓએ GE એરોસ્પેસ અને મશીનરી બનાવતી કંપની ઓશકોશ સાથે પણ વાતચીત કરી છે. સરકાર જાણવા માંગે છે કે શું આ કંપનીઓ પોતાની એસેમ્બલી લાઇનને ઝડપથી સંરક્ષણ કાર્યો માટે બદલી શકે છે. આ મોટર્સ કંપનીઓ લાંબા સમયથી અમેરિકી સુરક્ષા એજન્સીઓને સૈન્ય વાહનો પૂરા પાડી રહી છે, તેથી તેમની પાસે પાયાનું માળખું પહેલેથી જ તૈયાર છે.

વોરટાઇમ લેવલિંગ
સંરક્ષણ સચિવ પીટ હેગસેથે આ રણનીતિને 'વોરટાઇમ લેવલિંગ' (Wartime Leveling) નામ આપ્યું છે. પેન્ટાગોનના એક અધિકારીએ જણાવ્યું હતું કે, સંરક્ષણ વિભાગ તમામ ઉપલબ્ધ કોમર્શિયલ ટેકનોલોજી અને સોલ્યુશન્સનો ઉપયોગ કરવા કટિબદ્ધ છે જેથી યુદ્ધના મેદાનમાં અમેરિકાની નિર્ણાયક સરસાઈ જળવાઈ રહે.

બીજા વિશ્વયુદ્ધની યાદો તાજી થઈ
વર્ષ 1940 ના દાયકામાં બીજા વિશ્વયુદ્ધ દરમિયાન પણ અમેરિકાએ આ જ રણનીતિ અપનાવી હતી. તે સમયે ફોર્ડ અને જીએમ જેવી કંપનીઓએ કારનું ઉત્પાદન બંધ કરીને ટેન્ક, ફાઈટર પ્લેન અને દારૂગોળો બનાવવાનું શરૂ કર્યું હતું. આજના આધુનિક યુગમાં ફરી એકવાર તે જ સ્તરની તૈયારીઓ અમેરિકામાં જોવા મળી રહી છે.

​​​​​​​જો ઈરાન સાથેનો જંગ વધુ ઉગ્ર બને છે, તો આગામી દિવસોમાં અમેરિકાની સડકો પર દોડતી કાર બનાવતી કંપનીઓ મિસાઈલો અને ડ્રોન બનાવતી જોવા મળી શકે છે. આ વાતચીત અત્યારે શરૂઆતના તબક્કામાં છે, પરંતુ તેને મોટા પાયે અમલમાં મૂકવાની તૈયારીઓ તેજ કરી દેવામાં આવી છે.