ભાવનગર,-તળાજા હાઈ-વે પર રાજપરા નં ૨ પાસે બોલેરો અને બાઈક વચ્ચે જોરદાર અકસ્માત સર્જાતાં બાઈક સવાર રાજપરા ન. ૨ ગામના માલધારી આલગોતર પરિવારના બે યુવાનો મેહુલભાઈ રત્નાભાઈ અને ભરતભાઈ બાલાભાઈ નું ઘટના સ્થળે મોત નીપજ્યું હતું. આ અકસ્માત એટલો ગંભીર હતો કે બાઈકને જોરદાર ટક્કર લાગીને બોલેરો કાર રોડ સાઈડમાં ઉતરી ગઈ હતી અને બોલેરોની ટક્કરથી ધડાકા સાથે બાઈક રસ્તા પર ફંગોળાઈ ગઈ હતી. આ ઘટનાની જાણ થતા રસ્તા પર લોકોના ટોળેટોળા ઉમટી પડયા હતા.
રાજપરા નંબર ૨ ગામના બંને યુવાનો વાડીએથી મોટરસાયકલ પર તેના ગામ જતા હતા, તેવામાં તળાજા થી ભાવનગર તરફ જઈ રહેલ બોલેરો કાર સાથે ટક્કર સર્જાતા આ બનાવ બન્યો હતો. આ બનાવો અંગે બંનેના મૃતદેહને પોસ્ટમોર્ટમ માટે ભાવનગર ખસેડી પોલીસે આગળની તપાસ હાથ ધરી હતી.