એટ્રોસિટીની ફરિયાદ: સામાપક્ષે પણ બે શખ્સો સામે ગુનો

ખંભાળિયાના શક્તિનગર વિસ્તારમાં શિરૂતળાવ ખાતે રહેતા શીતલબેન શૈલેષભાઈ મોહનભાઈ વાઢેર નામના 40 વર્ષના મહિલાના સસરા સાથે તેમના ઘરની સામે રહેતા ભરત સામરાભાઈ ધારાણી અને હિતેશ સામરાભાઈ ધારાણીને રોડ પર ચાલવા બાબતે બોલાચાલી થઈ હતી. આ બનાવને અનુલક્ષીને ફરિયાદી શીતલબેન તેમના ઘરે હતા, ત્યારે ઉપરોક્ત આરોપી ભરત ધારાણી એ તેમના ઘરની ડેલીમાં પથ્થરના ઘા મારી અને બિભત્સ ગાળો બોલવા લાગ્યો હતો. આ શખ્સ કથિત રીતે નશાની હાલતમાં હોવાનું શીતલબેનએ પોતાની પોલીસ ફરિયાદમાં જણાવ્યું છે. 

આ પ્રકરણમાં આરોપી ભરત અને હિતેશે ગાળાગાળી કરી, શીતલબેનના ઘરના ડેલામાં પથ્થરના ઘા કરી, તેમજ સસરાના મકાનની બારીના કાચને પથ્થર વડે તોડી, નુકસાની કર્યાની તેમજ તેઓને જાતિ પ્રત્યે અપમાનિત કરતા આ સમગ્ર પ્રકરણ સંદર્ભે ખંભાળિયા પોલીસે બંને શખ્સો સામે એટ્રોસિટી તેમજ બી.એન.એસ.ની જુદી જુદી કલમ હેઠળ ગુનો નોંધી, આગળની તપાસ એસ.સી. એસ.ટી. સેલના ડીવાયએસપી વી.પી. માનસેતા દ્વારા હાથ ધરવામાં આવી છે. 

સામા પક્ષે ભરત સામરાભાઈ ધારાણી (ઉ.વ. 25) એ શૈલેષ મોહનલાલ વાઢેર અને કિશન સોમાભાઈ ગંગેરા સામે ધોરણસર ફરિયાદ નોંધાવી છે. જેમાં ફરિયાદી ભરતભાઈ તેમજ આરોપીને અગાઉના ઝઘડાના મનદુઃખના કારણે પોતાના ઘરે જતી વખતે તેમને લોખંડના પાઇપ વડે બેફામ માર મારી, ફેક્ચર સહિતની ઇજાઓ કર્યાની તેમજ લાકડાના ધોકા વડે બેફામ માર મારી ઇજાઓ કર્યાનું આ ફરિયાદમાં જાહેર થયું છે. જે અંગેની તપાસ પી.એસ.આઈ. આઈ.આઈ. નોયડા ચલાવી રહ્યા છે.

શક્તિનગરના પ્રૌઢાને, રૂપામોરાના વૃદ્ધને હૃદયરોગનો જીવલેણ હુમલો