વેરાવળ બંદર વિસ્તારમાં ગતરાત્રીના રીપેરીંગ માટે પાર્ક કરાયેલી ફિશિંગ બોટમાં અચાનક ભીષણ આગ ભભૂકી ઊઠી હતી આગની ઘટનામાં બે ફિશિંગ બોટ સંપૂર્ણ બળીને ખાખ થઈ ગઈ છે જ્યારે અન્ય છ ફિશિંગ બોટોને સમય સૂચકતા વાપરી બચાવી લેવામાં સફળતા મળી હતી. વેરાવળ ફાયર સ્ટાફે છ કલાકની જહેમત બાદ આગ પર કાબુ મેળવ્યો હતો.
આ આગની ઘટના અંગે વિગતો આપતા વેરાવળ ફાયર સ્ટેશનના અધિકારી રવીરાજસિંહ ચાવડા એ જણાવ્યું હતું કે, રાત્રીના અંદાજે 2 : 15 વાગ્યા આસપાસ વેરાવળ બંદર માં મોટી આગ લાગ્યા નો કોલ આવતા તુરંત ફાયર બીગ્રેડ સ્ટાફના સુનિલભાઈ, હરપાલસિંહ, ફાયર મેન મયંકભાઈ, ભૌમિકસિંહ, જીતેશભાઈ, ભાવેશભાઈ, જીતેન્દ્રસિંહ સહિતનો સ્ટાફ તુરંત ઘટના સ્થળે દોડી ગયો હતો. બંદર ના ભીડીયા વિસ્તારમાં ઓક્શન હોલ નજીક પાર્ક કરેલી આઠ ફિશિંગ બોટ પૈકી બે ફિશિંગ બોટ માં આગ વધુ વિકરાળ બની રહી હતી જેના પર ફોમ અને પાણીનો સતત મારો ચલાવવામાં આવ્યો હતો પરંતુ આગ વધુ માત્રામાં હતી બીજી તરફ બાજુમાં અન્ય 6 ફિશિંગ બોટ પણ આ આગની લપેટમાં આવે તે પૂર્વે તાત્કાલિક ક્રેનની મદદ થી છએય ફિશિંગ બોટને સલામત સ્થળે ખસેડવામાં આવી હતી રાત્રી ના 2 વાગ્યા થી સવારે 8 વાગ્યા સુધી સતત 6 કલાક ની જહેમત બાદ આગ ને કાબુ માં લેવામાં સફળતા મળી હતી. આગ ને કાબુ માં લેવા 80 લીટર જેટલું ફોમ અને 75 હજાર લીટર પાણી નો મારો ચલાવવામાં આવ્યો હતો. આ આગ ક્યાં કારણસર લાગી તે હજુ સામે આવ્યું નથી ત્યારે પોલીસ દ્વારા આ ઘટના અંગે તપાસ હાથ ધરવામાં આવી છે. હાલ તો આ ઘટનામાં 2 ફિશિંગ બોટ સંપૂર્ણ પણે બળીને ખાખ થઈ જતા બોટ મલિકને લાખોનું નુકસાન થયું છે. જો કે સદનસીબે આગની ઘટના માં કોઈ જાનહાની થવા પામી નથી.વેરાવળ બંદરમાં બે ફિશિંગ બોટમાં આગ લાગતા બળીઙ્ગે ખાક: લાખોનું નુકસાન