ભાવનગર જિલ્લાના વલ્લભીપુરના વતની અને સુરતના અમરોલી વિસ્તારમાં રહેતા બે સગા ભાઈઓએ અનાજમાં નાખવાના ટીકડા ખાઈ લેતા ગંભીર હાલતે ખાનગી હોસ્પિટલમાં ખસેડાતા બન્નેએ ટૂંકી સારવાર બાદ દમ તોડી તોડી દીધો હતો. પિતાના મૃત્યુ બાદ બન્ને ભાઈઓ હિરાનું કામ કરી પરિવારનો જીવન નિર્વાહ કરતા હોવાનું તેમજ નવા ખરીદેલા ઘરના હપ્તા ને ભરાતા કંટાળી અંતિમ પગલું ભરી લીધાનું જાણવા મળ્યું હતું. ઘટનાના પગલે અમરોલી અને વલ્લભીપુર પંથકમાં શોકનું મોજું ફરી વળ્યું હતું.

ઘટના અંગે ઉપલબ્ધ પ્રાથમિક વિગતો મુજબ મુળ વલ્લભીપુરના અને છેલ્લા કેટલાક વર્ષોથી સુરતના અમરોલી વિસ્તારમાં સ્થાઈ થઈ હિરા ઉદ્યોગમાં કામ કરી પરિવારનો જીવન નિર્વાહ કરતા હિરેનભાઈ ચંદુભાઈ સુતરીયા અને પરીક્ષિતભાઈ ચંદુભાઈ સુતરીયા એ પોતાના ઘરે રૂમમાં જઈ અનાજમાં નાખવાના ઝેરી ટીકડા ખાઈ લેતા બન્નેને અતિ ગંભીર હાલતે ખાનગી હોસ્પિટલમાં ખસેડવામાં આવ્યા હતા.જ્યાં ટૂંકી સારવારમાં બન્ને ભાઈઓએ દમ તોડી દેતા પરિવારમાં રોકકળ મચી હતી.

ઘટનાની જાણ થતા અમરોલી પોલીસે દોડી જઈ બન્નેના મૃતદેહને પોસ્ટમોર્ટમ અર્થે ખસેડી અકસ્માતે મોતનો ગુનો નોંધી બનાવની તપાસ હાથ ધરી હતી. જેમાં પિતા ચંદુભાઈ સુતરીયાનું મૃત્યુ થયા બાદ હિરેનભાઈ અને પરીક્ષિતભાઈ હિરાનો વ્યવસાય કરી પરિવારનો જીવન નિર્વાહ કરતા હતા. અને અમરોલી વિસ્તારમાં ખરીદેલા નવા ઘરના હપ્તા ને ભરાતા ઉપરાંત છેલ્લા કેટલાક સમયથી આવક અનિયમિત થવાથી આર્થિક સ્થિતિ કથળી હોય બન્ને રોજીરોટીને લઈ વ્ય ગ્રતા અનુભવતા હતા. અને કોઈ યોગ્ય માર્ગ ને મળતા બન્નેએ પોતાના ઘરના રૂમમાં જઈ ઝેરી ટીકડા ખાઈ લીધા હોવાનું ખુલ્યું હતું.મૃતક બન્ને પૈકી હિરેનભાઈના લગ્ન હજુ ૮માસ પૂર્વે જ થયા હોવાનું પણ સામે આવ્યુ હતું.

આર્થિક સંકળામણમાંમાં પરિવારનો જીવન નિર્વાહ કરવા તેમજ ઘરના હપ્તા ને ભરી કંટાળી જઈ અંતિમ માર્ગ અપનાવી લેનાર બન્ને ભાઈઓ ના મૃત્યુથી સુતરીયા પરિવારમાં ભારે રોકકળ મચી હતી. તો બનાવના પગલે અમરોલી તેમજ વલ્લભીપુર પંથકમાં શોકનું મોજું ફરી વળ્યું હતું.