અમેરિકા અને ઈરાન વચ્ચેના યુદ્ધના મેદાનમાં હવે નિવેદનબાજીએ જોર પકડ્યું છે. સોમવારે અમેરિકી રાષ્ટ્રપતિ ડોનાલ્ડ ટ્રમ્પે દાવો કર્યો હતો કે તેમની ઈરાન સાથે વાતચીત થઈ છે અને આગામી 5 દિવસ સુધી અમેરિકા કોઈ હુમલો નહીં કરે. જોકે, ઈરાની સંસદના અધ્યક્ષ મોહમ્મદ બગેર ગાલિબફે આ દાવાને સંપૂર્ણપણે પાયાવિહોણો ગણાવ્યો છે.

ગાલિબફનું સોશિયલ મીડિયા પર નિવેદન
મોહમ્મદ બગેર ગાલિબફે સોશિયલ મીડિયા પ્લેટફોર્મ 'X' પર પોસ્ટ કરીને અમેરિકા અને ઈઝરાયેલ પર આકરા પ્રહારો કર્યા છે. તેમણે લખ્યું કે ઈરાનના લોકો હુમલાખોરો (અમેરિકા અને ઈઝરાયેલ) માટે પૂર્ણ અને કઠોર સજાની માંગ કરી રહ્યા છે. જ્યાં સુધી ઈરાનનો ટાર્ગેટ હાંસલ નહીં થાય, ત્યાં સુધી તમામ અધિકારીઓ દેશના સર્વોચ્ચ નેતા અને જનતા સાથે મજબૂતીથી ઉભા રહેશે.

બજારમાં હેરફેર કરવાનો ટ્રમ્પ પર આરોપ
ગાલિબફે ટ્રમ્પના નિવેદન પાછળ એક મોટું ષડયંત્ર હોવાનું જણાવ્યું છે. તેમણે આક્ષેપ કર્યો કે ટ્રમ્પ 'ફેક ન્યૂઝ'નો ઉપયોગ કરીને નાણાકીય બજાર અને તેલના ભાવોમાં હેરફેર કરવા માંગે છે. ગાલિબફના મતે અમેરિકા અને ઈઝરાયેલ અત્યારે જે યુદ્ધના 'દલદલ'માં ફસાયા છે, તેમાંથી બહાર નીકળવા માટે ટ્રમ્પ આવી ખોટી નિવેદનબાજી કરી રહ્યા છે.

વાતચીતના તમામ સંકેતો નકાર્યા
નોંધપાત્ર બાબત એ છે કે, આ પહેલા એવી ચર્ચાઓ ચાલી રહી હતી કે ઈરાન તરફથી ગાલિબફ પોતે અમેરિકા સાથે સંપર્કમાં છે. પરંતુ હવે તેમણે પોતે જ આ વાતનું ખંડન કરી દીધું છે. હાલની સ્થિતિ જોતા સ્પષ્ટ જણાય છે કે ઈરાન અત્યારે કોઈપણ પ્રકારની સમજૂતી કરવાના મૂડમાં નથી, બલ્કે તે વળતો પ્રહાર કરવા માટે સજ્જ છે.

વધતું જતું યુદ્ધનું જોખમ
નિષ્ણાતો માને છે કે ઈરાન તરફથી આવેલા આ કડક ઈનકાર બાદ મધ્ય પૂર્વમાં તણાવ ચરમસીમાએ પહોંચી શકે છે. જો આગામી દિવસોમાં કોઈ મધ્યસ્થી સફળ નહીં થાય, તો બંને દેશો વચ્ચે સીધો સૈન્ય સંઘર્ષ વધુ ભીષણ બની શકે છે.