અમેરિકામાં શું થવાનું છે તેની અગાઉથી આગાહી કરવી હવે પહેલા જેટલી મુશ્કેલ નથી રહી, ખાસ કરીને ડોનાલ્ડ ટ્રમ્પના રાષ્ટ્રપતિ પદ હેઠળ બધું જ શક્ય છે.જ્યારે એ વાત પ્રકાશમાં આવી હતી કે ટ્રમ્પ વહીવટીતંત્રે યમનમાં હુથી લડવૈયાઓ પર હુમલો કરવાની યોજના એક પત્રકાર સાથે અગાઉથી શેર કરી હતી, ત્યારે ઘણો હોબાળો થયો હતો.હવે આવી બીજી લીક થઇ છે. એક નવા અહેવાલ મુજબ, 15 માર્ચે યમન પર યુએસનો હુમલો શરૂ થાય તે પહેલાં, યુએસ સંરક્ષણ સચિવ પીટ હેગસેથે એક ખાનગી સિગ્નલ ગ્રુપ ચેટમાં આ હુમલા સંબંધિત મહત્વપૂર્ણ માહિતી શેર કરી હતી. આ જૂથમાં તેમની પત્ની, ભાઈ અને અંગત વકીલનો સમાવેશ થતો હતો. આનાથી ટ્રમ્પ સરકારની સુરક્ષા સંબંધિત બેદરકારી અંગે વધુ પ્રશ્નો ઉભા થયા છે.

આ રિપોર્ટે ફરી એકવાર પ્રશ્ન ઉઠાવ્યો છે કે ટ્રમ્પ સરકારના અધિકારીઓ એક સરળ મેસેજિંગ એપ પર આટલી ગુપ્ત અને સંવેદનશીલ સુરક્ષા માહિતી કેમ શેર કરી રહ્યા છે. સિગ્નલ એપ વોટ્સએપ જેવી જ મેસેજિંગ એપ છે, પરંતુ તે કોઈ સરકારી કે સુરક્ષિત સિસ્ટમ નથી.

લડાકુ વિમાનો ક્યારે ઉડાન ભરશે તેનો પણ ઉલ્લેખ કરી દેવાયો

અહેવાલમાં જણાવાયું છે કે પીટ હેગસેથે એક ખાનગી ચેટમાં આ માહિતી શેર કરી હતી, જેનો અહેવાલ ગયા મહિને ધ એટલાન્ટિક મેગેઝિન દ્વારા આપવામાં આવ્યો હતો. ન્યૂ યોર્ક ટાઈમ્સે તે ચેટ ગ્રુપ સાથે જોડાયેલા ચાર લોકોના ટાંચમાં લીધા છે. તેમણે કહ્યું કે બીજી ચેટમાં, એફ/એ-18 હોર્નેટ્સ જેટ ક્યારે ઉડાન ભરશે તેનો પણ ઉલ્લેખ કરવામાં આવ્યો હતો. આ જ લડાકુ વિમાનોએ યમનમાં હુતી બળવાખોરોના ઠેકાણાઓ પર હુમલો કર્યો હતો.

ચેટ ગ્રુપમાં અધિકારીના પત્ની સહીત એક ડઝન લોકો સામેલ

અગાઉ ચેટ ગ્રુપમાં, રાષ્ટ્રીય સુરક્ષા સલાહકાર માઇક વોલ્ટ્ઝ દ્વારા ભૂલથી ધ એટલાન્ટિક મેગેઝિનના એક પત્રકારનો ઉમેરો કરવામાં આવ્યો હતો. હવે જે નવો કિસ્સો પ્રકાશમાં આવ્યો છે તે એક અલગ ખાનગી ચેટ ગ્રુપનો છે, જે જાન્યુઆરીમાં પીટ હેગસેથે પોતે બનાવ્યો હતો. આ જૂથમાં તેમની પત્ની અને લગભગ એક ડઝન લોકોનો સમાવેશ થતો હતો જેઓ વ્યક્તિગત અને વ્યવસાયિક રીતે તેમની નજીક હતા. એક અહેવાલ મુજબ, આ જૂથનું નામ "ડિફેન્સ | ટીમ હડલ" હતું અને આ જૂથ તેના સત્તાવાર ફોનને બદલે તેના અંગત ફોનથી ચલાવવામાં આવી રહ્યું હતું