ઓખા મંડળના મીઠાપુર તાબેના મોજપ ગામે રહેતા ભરતભા પાલાભા માણેક નામના ૩૫ વર્ષના યુવાન દ્વારકા-ઓખા હાઈવે પરની માધવ ગૌશાળા પાસેથી ચાલીને જઈ રહ્યા હતા, ત્યારે આ માર્ગ પરથી પૂર ઝડપે અને બેફિકરાઈપૂર્વક આવી રહેલા જી.જે. ૧૦ ટીટી ૫૨૫૭ નંબરના એક ટોરસ ટ્રકના ચાલકે ભરતભા માણેકને અડફેટે લીધા હતા.
આ જીવલેણ ટક્કરમાં ભરતભાને શરીરના જુદા-જુદા ભાગોમાં ગંભીર ઈજાઓ થતા તેમનું સારવાર દરમિયાન મૃત્યુ નીપજ્યું હતું. આ બનાવની જાણ મૃતકના માતા ધીરબાઈ માણેકએ મીઠાપુર પોલીસને કરતા પોલીસે ટોરસ ટ્રકના ચાલક સામે આઈ.પી.સી. કલમ ૩૦૪ (અ), ૩૩૭ તથા એમ.વી. એક્ટની કલમ મુજબ ધોરણસર કાર્યવાહી હાથ ધરી છે.