અત્યાર સુધી ચીનની તરફદારી કરતા અને ચીન માટે રેડ કાર્પેટ સન્માન આપતા માલદીવના રાષ્ટ્રપતિ મોહમ્મદ મુઈઝુએ હવે પોતાના સુર બદલ્યા છે અને નવી દિલ્હી આવ્યા બાદ ભારતની ભરપુર પ્રશંશા કરવાનું શરુ કર્યું છે અને કહ્યું કે ભારત અને માલદીવની દોસ્તી તો સદીઓ જૂની છે,ભારત માલદીવના લોકોનું બીજું ઘર છે.ભારતની મુલાકાત દરમિયાન, મોહમ્મદ મુઇઝુએ ઘણી વખત બંને દેશો વચ્ચે પરસ્પર ભાગીદારીના મહત્વને વ્યક્ત કર્યું છે. તેમણે દ્વિપક્ષીય વાટાઘાટો બાદ પણ ભારતની ભરપૂર પ્રશંસા કરી હતી.માલદીવના રાષ્ટ્રપતિ મોહમ્મદ મુઈઝુએ ભારતના વખાણ કરતા કહ્યું કે ભારત તબીબી શિક્ષણ અને પર્યટનની દ્રષ્ટિએ માલદીવવાસીઓ માટે બીજું ઘર છે.
માલદીવના રાષ્ટ્રપતિ મોહમ્મદ મુઈઝુ, જે ગયા વર્ષ સુધી ભારત વિરોધી ધૂન ગાતા હતા તે હવે સંપૂર્ણપણે બદલાઈ ગયા છે. હવે તે ભારતના વખાણ કરતાં થાકતા નથી. તેઓ ભારત સાથેની ભાગીદારીને પણ મહત્વપૂર્ણ ગણાવી રહ્યા છે.
ભારતના પ્રવાસે આવેલા મોહમ્મદ મુઈઝુએ ચીન સાથેની નિકટતા વિશે પૂછવા પર ઘણી વખત કહ્યું છે કે તેઓ એવું કંઈ કરશે નહીં જે ભારત વિરુદ્ધ હોય. હવે ફરી એકવાર તેમણે રાજ્યના એક કાર્યક્રમમાં ભારતના વખાણ કયર્િ છે. રાષ્ટ્રપતિ દ્રૌપદી મુર્મુના આમંત્રણ પર રાષ્ટ્રપતિ ભવન પહોંચેલા મુઈઝુએ કહ્યું, અમારી મિત્રતા સદીઓ જૂના દરિયાઈ સંબંધો, વેપાર અને સાંસ્કૃતિક આદાનપ્રદાન પર આધારિત છે. ભારત વેપાર માટે વિશ્વ-સ્તરીય સ્થળ છે, આરોગ્યસંભાળ, શિક્ષણ અને પર્યટન માલદીવના લોકો માટે બીજું ઘર સમાન છે.

પીએમ મોદીને આવતા વર્ષે માલદીવ આવવા પણ આમંત્રણ
આ પહેલા મુઈઝુએ હૈદરાબાદ હાઉસમાં દ્વિપક્ષીય મંત્રણા બાદ પણ ભારતની પ્રશંસા કરી હતી. મુઇઝુએ કહ્યું હતું કે, માલદીવ અમારા દેશોનો પ્રતિબદ્ધ મિત્ર બની રહેશે અને અમારા ક્ષેત્રમાં શાંતિ અને વિકાસની અમારી સહિયારી દ્રષ્ટિ રહેશે. તેમણે પીએમ મોદીને રાજદ્વારી સંબંધોની 60મી વર્ષગાંઠની ઉજવણી કરવા આવતા વર્ષે માલદીવની મુલાકાત લેવાનું પણ આમંત્રણ આપ્યું હતું.માલદીવને આર્થિક સહાય અંગે, મુઇઝુએ કહ્યું, હું વડા પ્રધાન મોદી, સરકાર અને ભારતના લોકોનો આભાર માનું છું કે છેલ્લા કેટલાક વર્ષોમાં માલદીવને આપવામાં આવેલી ઉદાર મદદ અને સહકાર માટે, જેમાં તાજેતરમાં ટી (ટ્રેઝરી) જારી કરવામાં આવી છે. બિલ્સ રોલઓવરના રૂપમાં બજેટરી સપોર્ટ પણ સામેલ છે.