બોલિવૂડની જાણીતી અભિનેત્રી કૃતિ સેનન અને તેના રૂમર્ડ બોયફ્રેન્ડ કબીર બહિયાના બ્રેકઅપની અફવાઓએ સોશિયલ મીડિયા પર જોર પકડ્યું છે. સોશિયલ મીડિયા પર એક તસવીર જોરદાર વાયરલ થઈ રહી છે, જેમાં કબીર એક મિસ્ટ્રી ગર્લ સાથે જોવા મળી રહ્યો છે.અભિનેત્રી કૃતિ સેનન આ દિવસોમાં પોતાની ફિલ્મ 'કોકટેલ 2' ને લઈને હેડલાઇન્સમાં છે. 19 જૂને પ્રદર્શિત થયેલી આ રોમેન્ટિક કોમેડી ડ્રામા ફિલ્મમાં તેના અભિનયના ખૂબ વખાણ થઈ રહ્યા છે. આ ફિલ્મ બોક્સ ઓફિસ પર પણ ઠીક-ઠાક પ્રદર્શન કરી રહી છે. ફિલ્મમાં રશ્મિકા મંદાના અને શાહિદ કપૂર પણ મુખ્ય ભૂમિકામાં છે. આ ફિલ્મની ચર્ચા વચ્ચે હવે કૃતિ સેનન પોતાની અંગત જિંદગીને લઈને ચર્ચામાં આવી ગઈ છે.વાસ્તવમાં, છેલ્લા ઘણા સમયથી કૃતિ સેનનનું નામ ઉદ્યોગપતિ (બિઝનેસમેન) કબીર બહિયા સાથે જોડવામાં આવી રહ્યું છે. બંને ઘણી વખત એકસાથે જોવા મળ્યા છે અને રજાઓ ગાળવા ગયા હોવાની તેમની તસવીરો પણ સોશિયલ મીડિયા પર ખૂબ વાયરલ થઈ હતી. એટલું જ નહીં, કબીર બહિયા તાજેતરમાં જ કૃતિની બહેન નૂપુર સેનનના લગ્નમાં પણ હાજર રહ્યો હતો. પરંતુ હવે કૃતિ સેનન અને તેના કથિત બોયફ્રેન્ડ કબીર બહિયા વચ્ચે બ્રેકઅપ થઈ ગયું હોવાની અફવાઓ સોશિયલ મીડિયા પર તેજ થઈ ગઈ છે.સોશિયલ મીડિયા પ્લેટફોર્મ પર કબીર બહિયાની એક તસવીર સામે આવી છે, જેમાં કબીર એક અજાણી યુવતી સાથે જોવા મળી રહ્યો છે. તસવીરમાં તે તે યુવતીની ખૂબ જ નજીક દેખાઈ રહ્યો છે. આ કોઈ પાર્ટીનો ફોટો હોય તેવું લાગી રહ્યું છે. કબીર સાથે જોવા મળી રહેલી આ યુવતી કોણ છે, તે અંગે હજુ સુધી કોઈ માહિતી સામે આવી નથી. આ ફોટો વાયરલ થતાં જ અટકળો લગાવવામાં આવી રહી છે કે કૃતિ અને કબીરનું બ્રેકઅપ થઈ ગયું છે. જોકે, કૃતિ અને કબીર તરફથી ક્યારેય પણ આ સંબંધ કે બ્રેકઅપ અંગે સત્તાવાર રીતે કોઈ પુષ્ટિ કરવામાં આવી નથી.અહેવાલો અનુસાર, કબીર બહિયા 'વર્લ્ડવાઈડ એવિએશન એન્ડ ટૂરિઝમ લિમિટેડ' ના સ્થાપક (ફાઉન્ડર) અને મેનેજિંગ ડિરેક્ટર છે, જે કંપની તેમણે વર્ષ 2020 માં શરૂ કરી હતી. તેમની આ ફર્મ એરલાઈન પ્રતિનિધિત્વ સેવામાં નિપુણતા ધરાવે છે. તેઓ એક ખૂબ જ સમૃદ્ધ પરિવારમાંથી આવે છે. તેમના પિતા કુલજિંદર બહિયા એક અગ્રણી બ્રિટિશ ટ્રાવેલ એજન્સી 'સાઉથોલ ટ્રાવેલ' ના માલિક છે. કબીર પોતાના આખા પરિવાર સાથે બ્રિટનમાં રહે છે. આ સિવાય કબીર બહિયા ભારતીય ક્રિકેટર મહેન્દ્ર સિંહ ધોનીની પત્ની સાક્ષી ધોનીના સંબંધી છે. સાક્ષી ધોની સાથે કબીરે ઘણી તસવીરો પણ પોતાના ઇન્સ્ટાગ્રામ પર શેર કરેલી છે.