આલાપ એવન્યુ વિસ્તારમાં રહેણાંક મકાનને નિશાન બનાવતા તસ્કરો : રોકડ અને દાગીના લઇ ગયા

જામનગર શહેરમાં તસ્કરોના પરોણાં થયા છે, અને રણજીતસાગર રોડ પર આવેલા એક બંધ મકાનને  નિશાન બનાવી લઈ સોનાના દાગીના અને રોકડ રકમ સહિત ત્રણ લાખની માલ મતાની ચોરી થયાનું પોલીસમાં જાહેર થયું છે.
જામનગરમાં રણજીત સાગર રોડ પર સાંઈબાબાના મંદિરની પાછળના ભાગમાં આલાપ એવન્યુ ના બ્લોક નંબર ૨૩-૪ માં રહેતા જયશ્રીબેન પતંજલિભાઈ ભટ્ટના બંધ રહેણાંક મકાનને કોઈ તસ્કરોએ નિશાન બનાવી લીધું હતું, અને મકાનમાંથી રૂપીયા ૫૦,૦૦૦ ની રોકડ રકમ તેમજ સોનાનું મંગળસૂત્ર, ચાર નંગ વીંટી, તથા સોનાનો ચેન અને બે નંગ સોનાની બંગડી સહિત ત્રણ લાખની માલમતા ની ચોરી કરી ગયા હતા.
 જે ચોરીના બનાવ અંગે જયશ્રીબેન ભટ્ટ એ સિટી એ. ડિવિઝન પોલીસમાં ફરિયાદ નોંધાવતાં પોલીસ કાફલો ઘટના સ્થળે દોડી ગયો હતો, અને તસ્કરોને પકડવા માટે તપાસને લંબાવવામાં આવી છે.