કચ્છના વાતાવરણમાં આજે અચાનક પલટો જોવા મળ્યો હતો. સવારથી તડકો હતો, પરંતુ બપોર બાદ વાતાવરણમાં અચાનક બદલાવ આવ્યો હતો અને વાદળછાયું વાતાવરણ સર્જાયું હતું.

પશ્ચિમ કચ્છના નખત્રાણા તાલુકાના ઉલટ વિસ્તારમાં વરસાદી ઝાપટાં પડ્યા હતા. આ ઉપરાંત ભુજ શહેરમાં પણ વરસાદી માહોલ જોવા મળ્યો હતો. જેના કારણે વાતાવરણમાં ઠંડક પ્રસરી હતી.

હવામાન નિષ્ણાત અંબાલાલ પટેલે અગાઉથી જ માર્ચ મહિનામાં ગુજરાતના વાતાવરણમાં ફેરફાર થવાની શક્યતા વ્યક્ત કરી હતી. તેમણે આગાહી કરી છે કે 20 એપ્રિલથી રાજ્યમાં ગરમીનું પ્રમાણ વધશે. વધુમાં 26 મે સુધી આંધી અને વંટોળની શક્યતા પણ તેમણે દર્શાવી છે.

અંબાલાલ પટેલે એમ પણ જણાવ્યું છે કે આ વર્ષે અમદાવાદ, વડોદરા અને પંચમહાલ જેવા વિસ્તારોમાં આકરી ગરમી પડવાની સંભાવના છે. દક્ષિણ ગુજરાતમાં પણ ગરમીનું પ્રમાણ વધશે, જ્યારે કચ્છમાં પવન સાથે ગરમીનો અનુભવ થશે.

આજના વરસાદી ઝાપટાંએ લોકોને ગરમીથી થોડી રાહત અપાવી છે, પરંતુ હવામાન વિભાગની આગાહી મુજબ આગામી દિવસોમાં ગરમીનું જોર વધવાની શક્યતા છે.