કોઠારીયા રોડ પર રહેતા અને સોમનાથ ઇન્ડસ્ટ્રીઝ એરિયામાં કારખાનું ધરાવનાર કારખાનેદારના રાત્રીના બંધ કારખાનામાંથી સવા લાખની કિંમતના કોપર વાયરના ચાર બાચકા ચોરી થયા અંગે આજીડેમ પોલીસ સ્ટેશનમાં ફરિયાદ નોંધાવવામાં આવી છે. ચોરીના આ બનાવવાની લઈ આજીડેમ પોલીસે તપાસ હાથ ધરી એક શકમંદને ઉઠાવી લીધો હોવાનું જાણવા મળ્યું છે.
ચોરીના આ બનાવની જાણવા મળતી વિગતો મુજબ, કોઠારીયા રોડ પર ધારેશ્વર મંદિરવાળી શેરીમાં આસોપાલવ શેરી નંબર-5 માં રહેતા ઘનશ્યામભાઈ ભરતભાઈ સખીયા (ઉ.વ 26) દ્વારા આજીડેમ પોલીસ સ્ટેશનમાં નોંધાવવામાં આવેલી ફરિયાદમાં જણાવ્યું હતું કે, તેઓને કોઠારીયા સોલવન્ટ સોમનાથ ઇન્ડસ્ટ્રીઝ એરીયા 66 ફૂટ મેઇન રોડ પર શ્રીજી ઈલેક્ટ્રીક એન્ડ પાવર ટુલ્સ નામનો કારખાનું આવેલું છે.
ગત તારીખ 21/9 ના રાત્રીના તેઓ અહીં કારખાનના શટ્ટરને તાળું મારી ઘરે ગયા હતા બીજા દિવસે સવારે 08:15 વાગ્યે કારખાને આવતા શટ્ટર ખોલી અંદર પ્રવેશ કરતા શેડના ઉપરના ભાગે આવેલ પતરૂ તૂટેલી હાલતમાં હોય જેથી કારખાનામાં તપાસ કરતા પાછળનાભાગે આવેલ કોપર વાયરના ચાર બાચકા જેનું વજન આશરે 120 કિલો હોય જે અંદાજિત રૂપિયા 1.25 લાખની કિંમતના હોય આ બાચકા જોવા મળ્યા ન હતા. આજુબાજુ તપાસ કરતા ક્યાંય કોપર વાયર જોવા મળ્યો ન હતો. જેથી જ રાત્રિના અહીંથી કોઈ સવા લાખની કિંમતના કોપર વાયરની ચોરી કરી ગયું હોવા અંગે તેમણે આજીડેમ પોલીસ સ્ટેશનમાં આ ફરિયાદ નોંધાવી છે.
ચોરીના આ બનાવને લઈ આજીડેમ પોલીસ મથકના પીઆઇ એ.બી. જાડેજાની રાહબરી હેઠળ પીએસઆઇ જે.જી.રાણા તથા તેમની ટીમને તપાસ હાથ ધરી આ ચોરી પ્રકરણમાં શકમંદને ઉઠાવી લઇ તેની પૂછપરછ શરૂ કરી હોવાનું જાણવા મળ્યું છે.