નૈઋત્યના ચોમાસાના પ્રારંભની સાથે જ રાજકોટમાં ગઇકાલે તા.૧ જુનને રવિવારથી રાજકોટ સિંચાઇ વર્તુળનો ફ્લડ કન્ટ્રોલ રૂમ ધમધમ્યો છે. અલબત્ત છેલ્લા ૪૮ કલાકમાં સૌરાષ્ટ્રમાં ક્યાંય વરસાદ નોંધાયો નથી કે એક પણ ડેમમાં નવા નીરની આવક નોંધાઇ નથી. માત્ર આજી-૧ ડેમમાં બે દિવસમાં સૌની યોજનાના નર્મદાનીરની અડધો ફૂટની આવક નોંધાઇ હતી.

અત્રે ઉલ્લેખનીય છે કે રાજકોટ સિંચાઇ વર્તુળ હેઠળ રાજકોટ શહેરને પીવાનું પાણી પુરૂ પાડતા મુખ્ય જળ સ્ત્રોત આજી-૧, ન્યારી-૧ અને ભાદર-૧ સહિત રાજકોટ જિલ્લાના ૨૭, મોરબી જિલ્લાના ૧૦, જામનગર જિલ્લાના ૨૧, દ્વારકા જિલ્લાના ૧૨, સુરેન્દ્રનગર જિલ્લાના ૧૧, પોરબંદર જિલ્લાનો એક તેમજ અમરેલી જિલ્લાનો એક મળી કુલ ૮૩ ડેમનું કાર્યક્ષેત્ર સમાવિષ્ટ છે.