મેરેજ રજિસ્ટ્રેશન હવે ફરજિયાત છે અને મહાનગર વિસ્તારમાં રજિસ્ટ્રેશનની સત્તા મહાનગરપાલિકાની આરોગ્ય શાખાના મુખ્ય આરોગ્ય અધિકારીને સુપ્રત કરાયેલી છે. આમ છતાં નવદંપતિઓ લગ્ન બાદ તેમની અનુકૂળતાએ અથવા તો જરૂરિયાત ઉપસ્થિત થાય ત્યારે રજિસ્ટ્રેશન કરાવવા માટે મહાપાલિકા કચેરીએ આવતા હોય છે પરંતુ આજે રાજકોટ મહાપાલિકાની સેન્ટ્રલ ઝોન કચેરીમાં એક વર કન્યા લગ્ન મંડપના પરંપરાગત પોષાકમાં આવ્યા હતા અને મેરેજ રજિસ્ટ્રેશન માટે પહોંચ્યા હતા !

શેરવાની-સાફો પહેરીને વરરાજા તેમજ પાનેતર પહેરી આવેલી કન્યાને નિહાળી મહાપાલિકા કચેરીમાં સૌએ સુખદ આશ્ચર્ય અનુભવ્યું હતું કેમકે અગાઉ ક્યારેય આવું બન્યું નથી. વર વધુ સાથે તેના મામા પણ ઉપસ્થિત રહ્યા હતા. રૂબરૂ મુલાકાત દરમિયાન આ નવદંપતિએ તેમનું નામ જણાવવા અનિચ્છા વ્યક્ત કરી હતી. જો કે આ નવદંપતિને લગ્નના પરંપરાગત પોષાકમાં નિહાળ્યા બાદ સ્ટાફએ વિના વિલંબે તેમનું કામ ઉકેલ્યું હતું. મેરેજ રજિસ્ટ્રેશન મામલે લોકોમાં જાગૃતિનો અભાવ છે ત્યારે આ એક પ્રેરણારૂપ કિસ્સો છે.