ભાવનગર શહેર નજીક આવેલા સીદસર ખાતે રહેતા ૨૧ વર્ષીય યુવાનનો કુવામાંથી ગળાફાંસો ખાધેલી હાલતે મૃતદેહ મળી આવ્યો હતો. યુવાન બકરા ચરાવવા ગયા બાદ એક બકરાને શોધવા પોતે ભાગવી રાખતા વાડી ખાતે ગયા બાદ પરત નહીં આવતા પરિવારજનો દ્વારા શોધખોળ હાથ ધરવામાં આવી હતી. જે દરમિયાન કુવામાં વાયર સાથે લટકતી હાલતે મૃતદેહ મળી આવ્યો હતો. જેને ફાયર ની મદદથી બહાર કાઢી હોસ્પિટલ લાવવામાં આવતા પોલીસે તપાસ હાથ ધરી હતી.

 આ બનાવ અંગે મળતી માહિતી અનુસાર ભાવનગર શહેર નજીક આવેલા સીદસર ગામે રહેતા અને ખેત મજૂર તરીકે વાડીએ ભાગયું રાખી બકરાનું પશુપાલન કરી પોતાનું ગુજરાન ચલાવતા યુવાન શ્યામભાઈ અશોકભાઈ ચારોલીયા (ઉ.વ.૨૪) પોતાના બકરા ચરાવવા ગયા હતા. તે વેળાએ સાંજે બકરા ચરાવીને પરત ઘરે આવ્યા હતા. તેવામાં એક બકરું મળી નહીં આવતા યુવાન પોતાના બકરાને શોધવા બાઈક લઈને ગયો હતો. ત્યારબાદ મોડે સુધી ઘરે પરત નહીં આવતા પરિવારજનો દ્વારા યુવાનની શોધખોળ હાથ કરવામાં આવી હતી. જે દરમિયાન સીદસર નજીક એન્જિનિયરિંગ કોલેજની પાછળ આવેલી વાડીના કુવામાં ઈલેક્ટ્રીક મોટરના વાયર સાથે ગળાફાંસો ખાધેલી હાલતે યુવાનો મૃતદેહ મળી આવ્યો હતો. બનાવ અંગે પરિવારજનો દ્વારા ફાયર બ્રિગેડ અને ૧૦૮ ને જાણ કરવામાં આવી હતી. ત્યારે ૧૦૮ અને ફાયર બ્રિગેડની ટીમ ઘટના સ્થળે પહોંચી ફાયર બ્રિગેડ સ્ટાફ દ્વારા યુવાનના મૃતદેહને કુવામાંથી બહાર કાઢવામાં આવ્યો હતો. અને મૃતદેહને ભાવનગર સર ટી હોસ્પિટલ ખાતે ખસેડવામાં આવ્યો હતો. બનાવને પગલે સર ટી હોસ્પિટલ પોલીસ ચોકી દ્વારા શંકાસ્પદ હોવા અંગે નોંધ કરી યુવાનના મૃતદેહને પીએમ અર્થે ખસેડી વરતેજ પોલીસ મથક ખાતે કેસ કાગળો મોકલી આપી કાર્યવાહી હાથ ધરી હતી.